الماتىدا موبيلوگرافتار اراسىنداعى تۇڭعىش فەستيۆالدىڭ جەڭىمپازدارى ماراپاتتالادى
ق ر پرەزيدەنتى جانىنداعى «دارا» دارىندىلاردى قولداۋ قورى ۇيىمداستىرعان فەستيۆالگە 16 مەن 40 جاس ارالىعىنداعى 7524 قازاقستاندىق موبيلوگراف قاتىستى.
فەستيۆالدىڭ I كەزەڭى 2022 -جىلدىڭ 1-قىركۇيەگى مەن 2023 -جىلدىڭ 1 -ءساۋىرى ارالىعىندا ونلاين رەجيمدە ءوتتى.
بايقاۋعا «مادەنيەت پەن سالت- ءداستۇر»، «تۋريزم»، «ادامدار» تاقىرىپتارى بويىنشا 1537 جۇمىس قابىلداندى.
بايقاۋدىڭ I كەزەڭىنىڭ قورىتىندىسى بويىنشا 100 ۇزدىك موبيلوگراف انىقتالدى. ولار ەكىنشى، قورىتىندى كەزەڭنىڭ تاپسىرمالارىن ورىنداۋدى جالعاستىردى.
ەسىمى daraqory.kz, infom.kz سايتتارىندا جاريالاندى.
بايقاۋدىڭ Ⅱكەزەڭىنىڭ جەڭىمپازدارى، ياعني 20 ۇزدىك جۇمىس اۆتورلارى نيۋ- يورك كينو ونەرى اكادەمياسىندا (NYFA) تاعىلىمدامادان وتۋگە جولداما الادى.
40 جەڭىمپاز اقشالاي سىيلىقپەن ماراپاتتالسا، 40 قاتىسۋشىعا «موبيلوگرافيا PRO» كۋرسىن ونلاين وقۋعا مۇمكىندىك بەرىلەدى.
ماراپاتتاۋ راسىمىنە «دارا» دارىندىلاردى قولداۋ قورىنىڭ پرەزيدەنتى نۇرلان قويانبايەۆ، «Mob Fest» فەستيۆالىنىڭ امباسسادورى اسحات شىناليەۆ جانە ق ر پرەزيدەنتى تەلەراديوكەشەنىنىڭ كرەاتيۆ جونىندەگى ديرەكتورى اسەل تۇرسىنعازينا قاتىسادى.
«MOB FEST» فەستيۆالىنىڭ جوعارى دەڭگەيدە ۇيىمداستىرىلعانىن ق ر ەڭبەك سىڭىرگەن قايراتكەرى جان بايجانبايەۆتىڭ، بەلگىلى پروديۋسەر جانە سەناريست ءسابيت راحىمبايەۆتىڭ، وتاندىق رەجيسسەرلەر ءانۋار ماتجانوۆتىڭ، دامير تاستەنبەكوۆتىڭ، الەن نيازبەكوۆتىڭ قازىلار القاسىنىڭ مۇشەلەرى رەتىندە بەلسەندى قاتىسۋىنان بايقاۋعا بولادى.
ماراپاتتاۋ راسىمىنە ارنايى شاقىرىلعان قوناقتار قاتىسادى: بەلگىلى قازاقستاندىق بلوگەرلەر الىشەر ەلىكبايەۆ، ادىلەت راحمەتوللا، نۇربول بەكبوتا، ناريمان ابيەۆ، قۋانىش شوڭباي، مەيىربەك بەردىباي ۇلى، يمانتاي يسلام، اسحات سادىرباي، انشىلەر عادىلبەك جاناي، نۇرجان كەرمەنبايەۆ، ايان بيربايەۆ، دانيار وتەگەن، ينۆەستورلار تالعات يسمايل، اسەت جۇماقۇلوۆ، اكتەر جانە جۇرگىزۋشى داۋلەت بيجانوۆ.
پرەزيدەنت جانىنداعى «دارا» دارىندىلاردى قولداۋ قورى تالانتتى جاستاردى قولداۋعا، ولاردىڭ شىعارماشىلىق الەۋەتىن جۇزەگە اسىرۋعا جانە قازاقستانداعى كرەاتيۆتى يندۋستريانى دامىتۋعا باعىتتالعان.
