مارات احمەتجانوۆ بانك قىزمەتكەرلەرىن كەپىلگە العان كۇدىكتىنىڭ قانداي تالاپ قويعانىن ايتتى

«تالاپتارى زاڭسىز جانە ولار ءارتۇرلى بولدى. مەن ىشكە كىرىپ، ونىمەن (كەپىلگە العان ەر ادام - اۆتور تۇسىندىرمەسى) سويلەستىم. ول بەلگىلى ءبىر شوتتارعا اقشا اۋدارۋدى، تۋىستارى مەن جاقىندارىنا كومەكتەسۋدى سۇرادى. سويلەسۋ ءۇشىن ءبىز ونىڭ تۋىستارىن كەلىسسوزگە تارتتىق. ءبىراق، ول ولاردىڭ ايتقانىنا كونبەدى. سوندىقتان، ارنايى وپەراتسيا ارقىلى كۇشپەن الۋ كەرەك بولدى»، - دەپ جاۋاپ بەردى مارات احمەتجانوۆ جۋرناليستەر ساۋالىنا وراي.

ال Kaspi بانكتىڭ باسپا ءسوز قىزمەتى قارۋلى ادام بانككە كىرگەن بويدا كۇزەت قىزمەتى دابىل تۇيمەسىن باسىپ ۇلگەرگەنىن ءمالىم ەتتى.

«18-ماۋسىمدا قارۋلى ادام Kaspi بانكتىڭ بولىمشەسىنە شابۋىل جاساپ، قىزمەتكەرلەرگە قاۋىپ ءتوندى. قۇزەت قىزمەتى تالاپقا ساي دابىل تۇيمەسىن دەرەۋ ىسكە قوستى. تيىسىنشە بۇل جەرگە پوليتسيا جەدەل جەتتى. كەپىلگە الىنعان ادامداردى بوساتۋ وپەراتسياسى 2 ساعاتقا سوزىلدى جانە ءساتتى اياقتالدى»، - دەپ ءمالىم ەتتى بانكتىڭ باسپا ءسوز قىزمەتىنەن.

ەسكە سالايىق، كەشە ەلورداداعى Kaspi بانكتىڭ عيماراتىندا قارۋلانعان ەر ادام بىرنەشە كىسىنى كەپىلگە العانىن حابارلاپ ەدىك.

پوليتسيا قىزمەتكەرلەرى كەپىلگە الىنعان ادامداردى بوساتتى.

ىشكى ىستەر ءمينيسترى مارات احمەتجانوۆ قازىر كۇدىكتىگە قاتىستى تەرگەۋ امالدارى ءجۇرىپ جاتقانىن ءمالىم ەتتى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى