ورماندا ءورت شىعىپ، اينالانى ءتۇتىن باسقاندا نە ىستەۋ كەرەك - دارىگەرلەر كەڭەسى

ش ق و دەنساۋلىق ساقتاۋ باسقارماسى باسپا ءسوز قىزمەتىنىڭ مالىمەتىنشە، ورمان ورتتەرىنەن پايدا بولعان قاتتى ءتۇتىن اۋانى باسقان كەزدە ادامداردىڭ ۋلانۋىنا، جۇرەك-قان تامىرلارى، وكپە جانە باسقا دا سوزىلمالى اۋرۋلاردىڭ ورشۋىنە اكەلىپ سوعۋى مۇمكىن. ونىڭ الدىن الۋ ماقساتىندا زياندى حيميالىق زاتتاردىڭ اعزاعا ءتۇسۋىن شەكتەيتىن پروفيلاكتيكالىق ءىس-شارالارعا ەرەكشە نازار اۋدارۋ كەرەك.

ورمان ءورتىنىڭ تۇتىنىنەن بارىنشا ۇلكەن قاۋىپكە كىم ۇشىرايدى؟ ولار:

- وكپەنىڭ وبسترۋكتيۆتى سوزىلمالى اۋرۋى، دەمىكپە نەمەسە جۇرەك اۋرۋى سياقتى ارۋلارى بار ادامدار؛

- ەگدە جاستاعى ادامدار تۇتىننەن كوبىرەك زارداپ شەگەدى. بۇل ولاردىڭ جۇرەك جانە وكپە اۋرۋلارىنا بايلانىستى بولۋى مۇمكىن؛

- ءتۇتىننىڭ بالالار دەنساۋلىعىنا قاۋپى جوعارى. بالالاردىڭ تىنىس الۋ جولدارى ءالى دە دامۋ ساتىسىندا جانە ولار ەرەسەكتەرگە قاراعاندا دەنە سالماعىنا قاراي كوبىرەك اۋا جۇتادى. سونىمەن قاتار بالالار اشىق اۋادا كوبىرەك ۋاقىت وتكىزەدى؛

- سىرتتا جۇمىس ىستەيتىن نەمەسە سپورتپەن بەلسەندى شۇعىلداناتىن ادامداردىڭ دا دەنساۋلىعىنا بارىنشا زيان كەلۋ قاۋپى جوعارى.

«ورمان ورتتەرىنەن شىققان تۇتىننەن زارداپ شەكپەس ءۇشىن تۇرعىندارعا ارنالعان ۇسىنىمدار: ءتۇتىن تۇمشالاعان دالادا سەرۋەندەۋدەن اۋلاق بولىڭىز، ويتكەنى بۇل جۇرەك- قان تامىرلارى مەن تىنىس الۋ جۇيەسىنىڭ جەدەل جانە سوزىلمالى اۋرۋلارىنىڭ دامۋىنا تۇرتكى بولادى. جۇكتى ايەلدەر مەن بالالار ءتۇتىندى كوشەگە مۇلدەم شىقپاۋى ءتيىس. دەنساۋلىعىندا كىناراتى بار ادامدار قاجەتتى ءدارى- دارمەكتەردى وزىمەن الىپ ءجۇرۋى كەرەك. تەرەزەلەرى جابىق ءۇي- جايلاردا بولىڭىز. ۇيدە اۋانى مۇمكىندىگىنشە تازا ۇستاڭىز. تەرەزەلەر مەن ەسىكتەردى جابىڭىز. كونديتسيونەردى قوسىپ، سىرتتاعى ءتۇتىننىڭ كىرۋىنە جول بەرمەڭىز»، - دەلىنگەن اقپاراتتا.

تەرەزەلەرگە، جەلدەتكىشتەرگە ىلعالدانعان شۇبەرەك ءىلىپ قويىڭىز جانە ونى مەزگىل-مەزگىل اۋىستىرىڭىز. كولىكتە بولساڭىز كونديتسيونەردى قولدانىڭىز جانە تەرەزەلەردى جابىق ۇستاڭىز.

ۇيدەگى اۋانىڭ لاستايتىن ارەكەتتەردەن اۋلاق بولىڭىز. جانىپ تۇرعان شامدار، كاميندەر جانە گاز پليتالارى ءۇي-جايلاردىڭ لاستانۋىن ارتتىرۋى مۇمكىن. شاڭسورعىش ءۇيىڭىزدىڭ ىشىندەگى قوقىستاردى كوتەرەدى، بۇل ءۇيدىڭ لاستانۋىنا ىقپال ەتەدى.

ەرەسەكتەر سۇيىقتىقتى تۇتىنۋدى تاۋلىگىنە 2-3 ليترگە دەيىن ارتتىرىپ، بالالارعا قايناعان سۋ بەرۋ كەرەك، ال سابيلەردى ءجيى ەمىزىپ، قوسىمشا تاماقتانۋ رەجيمىن ورناتۋ قاجەت.

تەمەكى شەگۋ اۋانى ودان ءارى لاستايدى. باستىڭ اۋرۋى سىندى كومىرقىشقىل گازىمەن ۋلانۋدىڭ العاشقى بەلگىلەرى پايدا بولعان كەزدە دەرەۋ مەديتسينالىق كومەككە جۇگىنۋ كەرەك.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى