قازاقستان پرەزيدەنتى: جەرگە قاتىستى جالعان اقپارات تاراتۋدى دوعارۋ كەرەك
«ەلىمىز ءۇشىن ستراتەگيالىق ماڭىزى بار تاعى ءبىر ماسەلە - شەكارالاس ايماقتاردى دامىتۋ. جەر - باستى بايلىعىمىز. تۋىڭدى تىگەر توقىمداي جەرىڭ بولماسا، ءوز مەملەكەتىڭ دە بولمايدى. بابالارىمىز بىزگە ۇلان-عايىر اۋماقتى ميراس ەتتى. ونى شاشاۋ شىعارماي ساقتاپ، كوركەيتۋ - ءبىزدىڭ قاسيەتتى بورىشىمىز. وسى ورايدا، «جەرىمىز شەتەلدىكتەرگە ساتىلىپ جاتىر» دەگەن ءسوز ارا-تۇرا ايتىلىپ جاتادى. بۇل - جالعان اقپارات»، - دەدى مەملەكەت باسشىسى.
پرەزيدەنت ەلىمىزدە جەرگە قاتىستى تۇبەگەيلى شەشىم الدەقاشان قابىلدانعانىن، ول شەشىم زاڭمەن ءبىرجولا بەكىتىلگەنىن باسا ايتتى.
«ءتۇرلى داقپىرتقا سەنىپ، جۇرتتى دۇرلىكتىرەتىن جالعان اقپارات تاراتۋدى دوعارۋ كەرەك. ءبىز بابالار اماناتىنا ءاردايىم ادال بولامىز. شەتەلدىكتەرگە قازاقتىڭ ءبىر قارىس جەرىن دە، ءبىر ۋىس توپىراعىن دا بەرمەيمىز. ونى كوزدىڭ قاراشىعىنداي ساقتايمىز. شەكارا ماڭىنداعى ەلدى مەكەندەردىڭ احۋالى جەرىمىزدىڭ تۇتاستىعىنا جانە ەلىمىزدىڭ اماندىعىنا تىكەلەي ىقپال ەتەدى. شىن مانىندە، بۇل - ستراتەگيالىق ماڭىزى بار ماسەلە. وكىنىشكە قاراي، شەكارا شەتىندەگى كەيبىر ەلدى مەكەندە حالىق سانى كۇرت ازايىپ كەتتى. بۇعان ءبىر كەزدەگى اۋدانداردى بىرىكتىرۋ جونىندەگى شەشىمدەر دە ىقپال ەتكەنى ءسوزسىز. وبلىستاردىڭ ىشكى اۋماقتىق-اكىمشىلىك قۇرىلىمىندا ويلاناتىن تۇستار بار. ءبىز بىلتىر اباي، ۇلىتاۋ جانە جەتىسۋ وبلىستارىن قۇردىق. بۇل شەشىم ايماقتاردىڭ دامۋىنا تىڭ سەرپىن بەردى»، - دەدى قاسىم- جومارت توقايەۆ.
