بۇل ماسەلە مەنى قاتتى الاڭداتادى - پرەزيدەنت ەسىرتكىنىڭ تارالۋ قاۋپى جايلى
«جاس ۇرپاقتىڭ، اسىرەسە، قازىرگى قۇبىلمالى زاماندا سىني تۇرعىدان ويلاي ءبىلۋى ماڭىزدى. بالالارىمىزدىڭ تانىمى كەڭ بولۋىنا جاعداي جاساۋىمىز قاجەت. بۇل تۋرالى بەلگىلى قوعام قايراتكەرى جاقسىبەك قۇلەكەيەۆ وتە ورىندى پىكىر ايتتى. مەكتەپتە وقۋشىلاردىڭ تۇلعا رەتىندە قالىپتاسۋىنا ىقپال ەتەتىن دارىستەر وقىتىلۋعا ءتيىس.
جاستار اقپاراتتى قورىتا ءبىلۋدى، ۋاقىتىن دۇرىس پايدالانۋدى، قارجى ساۋاتتىلىعىن مەكتەپ قابىرعاسىنان بىلە باستاۋى قاجەت. وسكەلەڭ ۇرپاقتى ءتۇرلى ويىندارعا قۇمار بولۋدان ساقتاندىرۋ كەرەك. بۇل ماسەلە بويىنشا قۇرىلتايدىڭ ءبىرقاتار مۇشەلەرى، سونىڭ ىشىندە بەلگىلى سپورتشى يسلام بايرامۋكوۆ جاقسى ايتتى. جەڭىل جولمەن پايدا تابۋ جاقسىلىققا اپارمايتىنىن ۇنەمى ءتۇسىندىرىپ وتىرعان ءجون. ادال تابىس ادال ەڭبەكپەن كەلەدى»، - دەدى قاسىم-جومارت توقايەۆ.
بۇل رەتتە پرەزيدەنت جاستار اراسىنداعى ناشاقورلىق ماسەلەسىنە ەرەكشە توقتالدى.
«بۇل - ۇلت ساۋلىعىنا زور ءقاۋىپ توندىرەتىن كەسەل. ەسىرتكى جاستاردىڭ جانىن دا، ءتانىن دە ۋلاپ جاتىر. ءبىز ەسىرتكىنى قولدانۋدىڭ، دايىنداۋدىڭ جانە تاراتۋدىڭ جولىن كەسىپ، تامىرىنا بالتا شابۋعا ءتيىسپىز. ايتپەسە، بۇكىل ەلىمىزدىڭ بولاشاعى بۇلىڭعىر بولادى. بۇل ماسەلە مەنى قاتتى الاڭداتادى. حيميالىق ەسىرتكىلەر نارىقتا كەڭ اۋقىمدا ساتىلۋدا. كريمينالدىق توپتار جاستاردى وسىنداي زاڭسىز ارەكەتتەرگە تارتىپ جاتىر»، - دەپ توقتالدى مەملەكەت باسشىسى.
