كەيدە بالالاردىڭ قاتىگەزدىگى جان تۇرشىكتىرەدى – ق ر پرەزيدەنتى
«ۇرپاق تاربيەسىنە ىقپال ەتەتىن شارالارعا باسا ءمان بەرۋىمىز كەرەك. بۇل سالادا كەمشىلىكتەر كوپ ەكەنى جاسىرىن ەمەس. مەكتەپتەگى تاربيە جۇمىسى اقساپ تۇر. سوڭعى كەزدە وقۋشىلاردىڭ ءبىر- بىرىنە قىسىم، زورلىق-زومبىلىق، الىمجەتتىك كورسەتۋى ءجيى بولىپ كەتتى. ونى، ءتىپتى، بەينەتاسپاعا ءتۇسىرىپ، الەۋمەتتىك جەلىگە سالۋ «سانگە» اينالدى. كەيدە بالالاردىڭ قاتىگەزدىگى جان تۇرشىكتىرەدى»، - دەدى پرەزيدەنت.
مەملەكەت باسشىسى وتباسىنداعى زورلىق-زومبىلىق قوعامداعى تاعى ءبىر كەلەڭسىز جانە وزەكتى ماسەلە بولىپ تۇرعانىنا نازار اۋدارتتى.
«مۇنداي زاڭسىز ارەكەت جاساعاندار مىندەتتى تۇردە زاڭ اياسىندا ءتيىستى جازاسىن الۋى كەرەك. ەلىمىزدىڭ بولاشاعى وتباسىندا قالىپتاسادى. ال، وتباسى باقىتتى بولسا، ەلىمىزدىڭ كەلەشەگى دە جارقىن بولادى. شىعىستىڭ ۇلى عۇلاماسى ءال- فارابي تاربيەسىز بەرىلگەن ءبىلىم - ادامزاتتىڭ قاس جاۋى ەكەنىن ايتقان. بالا تاربيەسى - ەڭ الدىمەن، اتا-انانىڭ مىندەتى»، - دەدى قاسىم-جومارت توقايەۆ.
پرەزيدەنت كەيدە اتا-انالار دۇرىس تاربيە بەرۋدىڭ ورنىنا وزدەرى جاعىمسىز ۇلگى كورسەتەتىندىگىنە قىنجىلىس تانىتتى.
«بالالاردىڭ تارتىبىنە بەيتاراپ، سەلقوس قارايدى، ءتىپتى، جاۋاپكەرشىلىكتىڭ ءبارىن مەكتەپكە، مۇعالىمدەرگە جۇكتەيدى. مەملەكەتتىڭ ەڭ باستى بايلىعى - ادام، ياعني ازاماتتار. بۇل - انىق نارسە. دەسەك تە، اتا- انالار بالانى مەملەكەت، ۇكىمەت نە قوعام ءۇشىن ەمەس، ەڭ الدىمەن، ءوزى ءۇشىن دۇنيەگە اكەلەدى. ءاربىر اتا-انا سانالى ۇرپاق وسىرۋگە باسا ءمان بەرۋگە ءتيىس. سول سياقتى مەكتەپ تە - ءبىلىمنىڭ عانا ەمەس، ءتالىم- تاربيەنىڭ ورداسى. بالانىڭ بويىنا بىلىممەن قاتار ادامگەرشىلىك قۇندىلىقتاردى ءسىڭىرۋ - ۇستازدىڭ مىندەتى. وسىعان وراي، بالاباقشاداعى جانە مەكتەپتەگى تاربيە ىسىنە ءبارىمىز قوعام بولىپ ءمان بەرۋىمىز كەرەك، سونداي-اق، بەلسەنە اتسالىسۋىمىز قاجەت»، - دەدى مەملەكەت باسشىسى.
