مەملەكەت باسشىسى: كوشپەندىلىك - قازاق حالقىنىڭ باستى برەندتەرىنىڭ ءبىرى
«قازاقتىڭ تاعى ءبىر ەرەكشەلىگى - كونە داۋىردەن بەرى كەلە جاتقان ءومىر سالتى. وزگە ەلدەر ءبىزدى كوشپەندىلەردىڭ ۇرپاعى رەتىندە بىلەدى. بۇل دا - حالقىمىزدىڭ باستى برەندىنىڭ ءبىرى. كەلەسى جىلى مەنىڭ شاقىرۋىممەن قازاقستاندا V دۇنيەجۇزىلىك كوشپەندىلەر ويىندارى وتەدى. بۇل قادام ۇلتتىق سپورتتى دامىتا تۇسۋگە زور مۇمكىندىك بەرەدى. سوندىقتان، بايراقتى باسەكەنى جوعارى دەڭگەيدە وتكىزۋىمىز كەرەك»، - دەدى مەملەكەت باسشىسى.
قاسىم-جومارت توقايەۆ مادەني مۇرامىزعا جەتەتىن بىرنەشە نىساندى ترانسۇلتتىق اتالىمدار بويىنشا يۋنەسكو تىزىمىنە ەنگىزۋ ءۇشىن ءوتىنىش بەرىلگەنىن ەسكە سالدى.
«بۇل شارۋا كورشى ەلدەرمەن بىرلەسىپ اتقارىلىپ جاتىر. جاقىندا يۋنەسكونىڭ باس ديرەكتورى ودرە ازۋلە حانىم مەنىڭ شاقىرۋىممەن قازاقستاندا بولدى. ول تۇركىستانعا ادەيى ات باسىن بۇردى. بۇل - بەدەلدى حالىقارالىق ۇيىم باسشىسىنىڭ سوڭعى 10 جىلدا ەلىمىزگە جاساعان العاشقى ساپارى. مەن ازۋلە حانىممەن ارنايى كەزدەستىم. ول ماعان بۋراباي، مارقاكول قورىقتارى جانە «ورتەكە» ونەرى يۋنەسكو تىزىمىنە ەنگىزىلگەنىن راستايتىن قۇجاتتى تابىستادى. مۇنىڭ ءبارى قازاقستاننىڭ تابيعي جانە مادەني مۇراسىن الەمگە تانىتۋعا سەپتىگىن تيگىزەرى ءسوزسىز. بىرەگەي سالت-ءداستۇرىمىزدى ماتەريالدىق ەمەس مۇرالار تىزىمىنە قوسۋعا قاتىستى جۇمىستى جالعاستىرۋ قاجەت»، - دەدى پرەزيدەنت.
