بۇگىن تۇركىستاندا ۇلتتىق قۇرىلتايدىڭ نەگىزگى وتىرىسى وتەدى
ەسكە سالايىق، ۇلتتىق قۇرىلتايدىڭ العاشقى وتىرىسى بىلتىر 16- ماۋسىمدا ۇلىتاۋ وبلىسىندا وتكەن بولاتىن. القالى جيىندا ءسوز سويلەگەن مەملەكەت باسشىسى كەلەسى باسقوسۋدى كيەلى تۇركىستاندا وتكىزۋدى ۇسىنعان ەدى.
«قۇرىلتايدىڭ ءار ايماقتا ءوتۋى سول ءوڭىردىڭ دامۋىنا سەرپىن بەرەدى. ونىڭ مۇشەلەرى ءار جولى ءبىر ءوڭىردىڭ تىنىس-تىرشىلىگىمەن تانىسادى»، - دەدى ق. توقايەۆ.
ال، قازىر ۇلتتىق قۇرىلتايدىڭ باستالۋىنا ساناۋلى عانا ساعاتتار قالدى. جيىنعا مەملەكەت باسشىسى قاسىم-جومارت توقايەۆ قاتىسادى دەپ جوسپارلانعان.
قۇرىلتاي وتەتىن الاڭ قازاقتىڭ 12 قاناتتى كيىز ءۇيى ءتارىزدى بەزەندىرىلگەن. ءار ايماقتان جينالعان ءتۇرلى سالا وكىلدەرى كەشە تۇركىستانعا كەلىپ، العاشقى سەكسيالىق جۇمىستارعا قاتىستى.
قۇرىلتاي بارلىق وبلىستىڭ، سان ءتۇرلى سالانىڭ، ءار بۋىننىڭ وكىلدەرىن قامتيدى. مۇندا ازاماتتىق ۇستانىمى بار ورتا بۋىننىڭ تاجىريبەسى، جاڭاشا ويلايتىن جاستاردىڭ تىڭ يدەيالارى ورتاعا سالىنادى.
