اۋىلداعى مادەنيەت ۇيلەرىنەن قارا قۇلىپ كوردىم - ازامات ساتىبالدى
جيىنعا قاتىسقان ت. جۇرگەنوۆ اتىنداعى قازاق ۇلتتىق ونەر اكادەمياسىنىڭ رەكتورى، قازاقستاننىڭ ەڭبەك سىڭىرگەن قايراتكەرى ازامات ساتىبالدى مادەنيەت سالاسىن كوتەرۋ كەرەك ەكەنىن ايتتى، دەپ حابارلايدى قازاقپارات ءتىلشىسى.
«عالام جاھاندىق مادەنيەت سالاسىندا، سونىڭ نەگىزىندە ءومىر ءسۇرىپ جاتىر. ءبىز الىگە دەيىن اۋىلدىق، اۋداندىق، قالالىق مادەنيەت دەپ بولىنەمىز. مۇنىڭ اراجىگى بولماۋ كەرەك. بارلىعىمىز جالپى ۇلتتىق جاھاندىق مادەنيەتكە ۇيىسۋىمىز قاجەت. قازىر اۋىل مەن قالانىڭ اراسىنداعى ايىرمانى الىپ تاستايتىن ۋاقىت كەلدى. سەبەبى بارلىعى قولجەتىمدى»، - دەدى ول.
سونداي-اق ازامات ساتىبالدى اۋىلداعى مادەنيەت ۇيلەرى تەك قاعاز جۇزىندە جۇمىس ىستەيتىنىن جەتكىزدى. سول سەبەپتى، ول ۇلتتىق قۇرىلتاي جيىندارىندا اۋىلدارداعى مادەنيەت ۇيلەرىنىڭ سانىن ارتتىرىپ، ساپاسىن كوتەرۋ كەرەكتىگىن ايتىپ جۇرگەنىن جەتكىزدى.
«كوپكە توپىراق شاشپايمىن. كوپتەگەن جەرگە بارىپ ءجۇرمىن. مەن مادەنيەت ۇيلەرى جۇمىس ىستەپ تۇرعان اۋىل كورگەن جوقپىن. بارلىعىندا قارا قۇلىپ تۇرادى. ال قاعاز جۇزىندە كەرەمەت جوبالار جاسالىپ، ۇيىرمەلەر ىستەپ تۇر. ءىس جۇزىندە اۋىل، اۋدان اكىمىنىڭ جينالىس وتكىزەتىن ورنى. بۇل بولمايدى. اۋىلداعى مادەنيەت ۇيلەرىن جانداندىرۋىمىز كەرەك. اۋدانداعى مادەنيەت ۇيلەرىندە كينوتەاترلار مەن قۋىرشاق تەاترلارى بولۋى كەرەك. مادەني وشاقتاردىڭ سانىن كوبەيتىپ، ساپاسىن ارتتىرۋىمىز قاجەت»، - دەدى ول.
سونداي-اق، تۇركىستان توپىراعىندا وتكەن قۇرىلتايدا ەلدىڭ وركەندەۋى جولىنداعى ماڭىزدى شەشىمدەر قابىلداناتىنىنا سەنىم ءبىلدىردى.
«ءبىز جىل بويى كىشكەنە توپتارعا ءبولىنىپ، ءبىر جىلعى پروبلەمالاردى كوتەرىپ، ۇسىنىستار جاسادىق. ەرتەڭ پرەزيدەنت ءبىرازىنىڭ شەشىمىن ايتادى دەگەن ويدامىز. قۇرىلتايدىڭ تۇركىستاندا ءوتۋى ۇلكەن مارتەبەلى ۇعىم دەپ تۇسىنەمىن. كيەلى جەردە ەلدىڭ بولاشاعى، ەلدىڭ وركەندەۋى ءۇشىن شىنايى ءبىر شەشىمدەر قابىلدانىپ، تىڭ دۇنيەلەر ايتىلىپ جاتسا، قۇبا-قۇپ»، - دەدى ول.
