قورعالجىن اۋدانىندا ءورتتى سوندىرۋگە تىكۇشاق جۇمىلدىرىلدى
بۇل تۋرالى ايماق باسشىسى ەرمەك مارجىقپايەۆتىڭ توراعالىعىمەن وتكەن وبلىستىڭ جەدەل شتابتىڭ وتىرىسىندا ايتىلدى، دەپ حابارلايدى قازاقپارات ءتىلشىسى وبلىس اكىمدىگىنىڭ باسپا ءسوز قىزمەتىنە سىلتەمە جاساپ.
ۆەدومستۆونىڭ مالىمەتىنشە، شتاب وتىرىسىندا اۋماقتىق ت ج د باستىعى نۇرلان اتىعايەۆتىڭ ءورت ءسوندىرۋ جۇمىستارى بارىسى جايىندا باياندادى. ونىڭ ايتۋىنشا، باتپاق، ەكپىندى جەل جانە تەحنيكا جۇرەتىن جولدىڭ جوقتىعى ءورتتى سوندىرۋگە ءبىراز قيىندىقتار كەلتىرۋدە. سول سەبەپتى، «قازاۆياقۇتقارۋ» ا ق تىكۇشاعى تارتىلدى.
«قازىرگى كەزدە ءتىلسىز جاۋدى اۋىزدىقتاۋعا قۇتقارۋ قىزمەتتەرىنىڭ كۇشتەرى مەن قۇرالدارى، اتاپ ايتقاندا 40 ادام مەن 16 تەحنيكا جانە 1 تىكۇشاق جۇمىلدىرىلدى. ءورتتىڭ تارالۋىن بولدىرماۋ ءۇشىن اۋەدەن سۋ شاشۋ جانە وت وشاقتارىن ءسوندىرۋ جۇمىستارى جۇرگىزىلۋدە. ءورتتىڭ شىعۋ سەبەبى انىقتالىپ جاتىر. ەلدى مەكەندەرگە قاۋىپ جوق»، - دەدى ۆەدومستۆودان.
ايتا كەتسەك، بۇدان بۇرىن قورعالجىندا جانىپ جاتقان 100 گەكتار قامىستى سوندىرۋگە تىكۇشاق تارتىلعانىن جازعان ەدىك.
