سەناتور مال تەرىسىن وڭدەۋ سالاسىنداعى تەتىكتەردى قايتا قاراۋدى ۇسىندى
ونىڭ ايتۋىنشا، بىلتىر ءجۇننىڭ 33 مىڭ تونناسى نەمەسە 82 پايىزى وڭدەلمەگەن. مال تەرىسىنە قاتىستى ءدال وسىنداي جاعداي بولعان. ياعني 2022 -جىلى تەرىنىڭ تەك %13,4 عانا وڭدەلگەن. جالپى، ءجۇن مەن تەرىنىڭ 80 پايىزدان استامىن جەكە شارۋاشىلىقتار وندىرەدى.
«وڭدەلمەگەن وسى شيكىزاتتىڭ باسىم بولىگى قوقىسقا تاستالادى. سونى اۋىلداردا يت سۇيرەپ جۇرەدى نەمەسە ورتەلەدى. مۇنىڭ بارلىعى ەلدى مەكەندەردەگى سانيتارلىق- ەپيدەميولوگيالىق جاعدايعا كەرى اسەرىن تيگىزىپ، ءتۇرلى اۋرۋلارعا اكەلىپ سوعاتىنى جاسىرىن ەمەس. دەگەنمەن، وتاندىق وڭدەۋ سەكتورىندا قالىپتاسقان وسى جاعدايدى تۇزەتىپ، مال شارۋاشىلىعى شيكىزاتىنىڭ اتالعان ەكى ءتۇرىنىڭ الەمدىك نارىقتا ەڭ سۇرانىسقا يە ءونىم بولىپ قالۋىنا مۇمكىندىك بار»، - دەدى ز. كۋزيەۆ سەناتتا وتكەن ۇكىمەت ساعاتىندا.
ونىڭ سوزىنە قاراعاندا، ءجۇن مەن تەرى وڭدەۋمەن اينالىسۋ فەرمەرلەر مەن كاسىپورىندار ءۇشىن ءتيىمدى بولادى.
«سوندىقتان قوي ءجۇنى مەن تەرىسىن ءوندىرۋ مەن وڭدەۋ سالاسىنداعى جۇمىس پەن مەملەكەتتىك رەتتەۋدىڭ ادىستەمەسىن قايتا قاراۋدى ۇسىنامىز»، - دەدى سەناتور.
بۇدان بۇرىن حابارلانعانداي، اۋىل شارۋاشىلىعى ءمينيسترى ەربول قاراشوكەيەۆ ەلىمىزدە تەرى مەن ءجۇن وڭدەۋ سالاسىنداعى جاڭا جوبالار تۋرالى ايتىپ بەردى.
