قازاقستاندا قانتتى جۇگەرى مەن ءبيدايدان ءوندىرۋ ۇسىنىلدى

«اۋىل شارۋاشىلىعى مينيسترلىگى ازىرلەگەن قانت سالاسىن دامىتۋ باعدارلاماسى جۇمىس ىستەمەي تۇر. ولاردىڭ جوسپارى بويىنشا 2021-جىلى وتاندىق شيكىزاتتان قانت ءوندىرىسى 121 مىڭ تونناعا دەيىن ارتۋى كەرەك ەدى، ال ءىس جۇزىندە 39 مىڭ توننا عانا وندىرىلگەن. ماماندار قانت قىزىلشاسىن ەگۋدى كوبەيتۋ ءۇشىن شارۋالارعا ءتيىستى تەحنيكا، تۇقىم جانە سۋارمالى جەر جەتىسپەيتىنىن ايتىپ وتىر. بۇل رەتتە باعدارلامادا 2022-2026-جىلدارعا بيۋجەتتەن 495 ميلليارد تەڭگە سوماسىندا قارجىلاندىرۋ ەسكەرىلگەن»، - دەدى ز. كۋزيەۆ بۇگىن سەناتتا وتكەن ۇكىمەت ساعاتىندا.

ول باسقا شيكىزات تۇرىنەن قانت ءوندىرىسىن دامىتۋدى ۇسىندى.

«بۇل تۇرعىدا جۇگەرى نەمەسە بيدايدان وندىرىلەتىن گليۋكوزالىق-فرۋكتوزا ءشارباتىن قاراستىرعان ءجون. بۇل داقىلدار قازىردىڭ وزىندە ءبىزدىڭ ەلدە جەتكىلىكتى مولشەردە ءوسىرىلىپ كەلەدى جانە تاماق ونەركاسىبىندە قانتتى الماستىرا الادى. ستاتيستيكاعا سۇيەنسەك، 2022-جىلى قازاقستاندا 2 ميلليارد ليترگە جۋىق ءتۇرلى سۋسىندار ءوندىرىلىپ، شامامەن 200 مىڭ توننا قانت پايدالانىلعان. سۋسىننىڭ ءار ليترىندە ورتاشا ەسەپپەن 100 گرام قانت بار»، - دەدى دەپۋتات.

«بۇل كولەم ەلىمىزدە پايدالانىلاتىن قانتتىڭ جارتىسىنا جۋىعى. وسى كولەمدى كوپتەگەن ەلدە سياقتى جۇگەرى نەمەسە بيدايدان وندىرىلگەن گليۋكوزالىق-فرۋكتوزا شارباتىمەن وڭاي الماستىرا الامىز. بۇل ءوز كەزەگىندە قانت يمپورتىن شامامەن %50 ازايتۋعا مۇمكىندىك بەرەدى»، - دەدى ول.

بۇدان بۇرىن حابارلانعانداي، اۋىل شارۋاشىلىعى مينيسترلىگى قانت وندىرۋشىلەردى باعا دەمپينگىنەن قورعاۋ تەتىگى ەنگىزىلگەنىن جاريالادى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى