تالدىقورعاندا اۋىل ايەلدەرىنىڭ فورۋمى ءوتتى
وعان الماتى، جامبىل، جەتىسۋ، قىزىلوردا، تۇركىستان وبلىستارىنىڭ ىسكەر ايەلدەرى قاتىسىپ جاتىر. ەلىمىزدە 6 جىلدان بەرى تۇراقتى ۇيىمداستىرىلىپ كەلە جاتقان بۇل شارا كوروناۆيرۋس پاندەمياسى كەزەڭىندە ونلاين فورماتتا وتكەن. بيىلدان باستاپ كوشپەلى بولادى جانە ەلىمىزدىڭ باتىس، شىعىس، ورتالىق، سولتۇستىك وڭىرلەرىن تۇگەل قامتيدى. قورىتىندى شارا اۋىل ايەلدەرىنىڭ VI رەسپۋبليكالىق فورۋمى ەلوردادا وتەدى. وعان دەيىن وڭىرلىك ماسەلەلەر وسىنداي اشىق ديالوگ الاڭدارىندا تالقىلانىپ، الداعى ماقسات- مىندەتتەر ايقىندالادى. سونىڭ ەڭ نەگىزگىلەرى - ايەلدەر كاسىپكەرلىگىن وركەندەتۋ، ءوزىن ءوزى جۇمىسپەن قامتۋ ارقىلى اۋىلدىڭ ءال-اۋقاتى مەن ءومىر ءسۇرۋ ساپاسىن ارتتىرۋ. فورۋمعا قاتىسۋشىلارعا بيزنەس نەگىزدەرى، فەرمەرلىك داعدىلاردى دامىتۋ جانە كووپەراتسيا بويىنشا ترەنينگتەر وتكىزىلەدى.
ايناش ءومىرسادىق قىزى، كاسىپكەر:
- اۋىل ايەلدەرى فورۋمى وڭتۇستىك ايماقتىق، اسىرەسە اۋىلدىڭ ايەلدەرىنە دەگەن ۇلكەن كومەك دەپ ويلايمىن. نەگە دەسەڭىز، اۋىلدا كاسىبىن جاساپ، جۇمىسىن جاساپ جۇرگەن ايەلدەر ءۇشىن قالاعا اپارىپ، وتكىزەتىن «توچكا» تابۋ وتە قيىن. مىنانداي فورۋمداردىڭ ارقاسىندا ءوزىمىزدىڭ بىلىمىمىزبەن، بىلىكتىلىگىمىزبەن ءبولىسىپ، كاسىپتەرىمىزدى كورسەتىپ، ءبىر- بىرىمىزگە ۇلكەن قولداۋ دەپ ويلايمىن.
مايرا ايسينا، فورۋمنىڭ ۇيىمداستىرۋ كوميتەتىنىڭ ءتوراعاسى:
- ايەلدەردىڭ دە قاق جارتىسى وسى اۋىلدى جەرلەردە تۇرادى. بۇگىنگى تاڭدا بىزدە وقىمايتىن، بىلمەيتىن ادام جوق قوي. سوندىقتان ايەلدەردىڭ دە بەدەلى وتە جوعارى. بەلسەندىلىگى دە وتە جوعارى. سوندىقتان وسىنداي فورۋمداردا كىشكەنە شىنىعىپ، ۇيرەنىپ، ەرتەڭ قوعام جۇمىسىنا دا ارالاسسىن دەگەن ءبىزدىڭ ويىمىز بار. سونىڭ ءوزىمىز ناتيجەسىن كورىپ تە كەلە جاتىرمىز.
