ەل نازارىن اۋدارعىسى كەلدى - تورەعالي تۋرالى وتاندىق جۇلدىزدار نە دەيدى
ونىڭ ارىپتەستەرى، وتاندىق جۇلدىزدار الەۋمەتتىك جەلىدە وقيعا تۋرالى ءوز پىكىرلەرىن جازۋدا، دەپ حابارلايدى قازاقپارات.
ەڭ الدىمەن ءانشى ءمولدىر اۋەلبەكوۆا تورەعالي تۋرالى ءۇن قاتتى.
«ارينە، دۇرىس دەپ ايتا المايمىن. ال جالپى ايتارىم، تورەش پەن ونىڭ وتباسى - جاقسى ادامدار. ول دا ءبىر انانىڭ بالاسى، ۇل-قىزدىڭ اكەسى. ءبىر بىلەرىم، ونىڭ باسىندا دا ىشتەن تىنىپ، سىر بىلدىرمەي جۇرگەن سىناقتارى بار. كەيبىرەۋلەر جەلىگە اۋىر ءسوز جازاردا ويلانسا ەكەن. اناسىنا وتە اۋىر عوي، انالار جىلاماسىنشى»، - دەپ جازدى ءمولدىر اۋەلبەكوۆا Instagram جەلىسىندە.
تانىمال اكتريسا جۇلدىز ابدىكارىموۆا ەل نازارى ورتتەن داۋعا اۋىستى دەپ قىنجىلۋدا.
«اڭعالمىز، تەز الدانامىز. 15 مارقۇمنىڭ توپىراعى دا سۋىپ ۇلگەرمەدى عوي. 60 مىڭ گەكتار ورمان كۇلگە اينالىپ ءالى دىمقىپ جاتىر. ەل نازارى ءبىر ساتتە باسقا شۋعا اۋا كەتتى. ادامنىڭ باسى اللانىڭ دوبى ەمەس پە؟ بىرەۋدىڭ شالىس باسقان ساتىندە نەگە عايباتقا دايىن وتىرامىز؟ زاڭ بۇزعانداردى جازالاۋ - قۇزىرلىلاردىڭ ءىسى. جىعىلعانعا جۇدىرىق بولماي، سابىرلىق تانىتايىقشى. الدا كىمدى نە كۇتىپ تۇرعانىن كىم بىلگەن؟ دوعارايىقشى»، - دەپ جازدى اكتريسا.
ءانشى مەرۋەرت تۇسىپبايەۆا دا ءدال سونداي پىكىردە.
«كەي ادامدار ءارتىستى ۇستاپ، باستى تاقىرىپتى جاپقىسى كەلەدى. سايلاۋ كەزىندە - ەركەنىڭ تويىن جىرلاپ، ءورتتىڭ سوڭىندا - تورەنى ۇستاپ… جاقسى امال، نەگىزى»، - دەيدى م. تۇسىپبايەۆا.
سونىمەن بىرگە، ءانشى قۋاندىق راحىم ارىپتەسىنە قولداۋ كورسەتتى.
«پەندەنىڭ قاشان دا ءتۇپ-ءتۇزۋ شىقپايدى ەسەبى، سودان سوڭ تۋادى جالا مەن وسەگى. اللا قالاسا، سۋ دا جانادى، وت تا وشەدى. اللا قالاسا قيىن كۇرمەۋدىڭ ءتۇيىنىن شەشەدى. اقتاپ الىپ جاتقان جوقپىن، ءبىراق اللا ەندى مۇنداي سىناق بەرمەسىن»، - دەدى ول.
ەسكە سالساق، الماتىدا ەسىرتكىگە ماسايعان كولىك جۇرگىزۋشى پوليتسەيلەرگە بوي بەرمەي، وقيعاعا ورنىنان قاشپاق بولعانى حابارلانعان ەدى. پاترۋلدىك پوليتسيا قىزمەتكەرلەرى جۇرگىزۋشىنىڭ ۇستادى جانە مەديتسينالىق ساراپتاما ناتيجەسىندە ونىڭ ەسىرتكىگە ماس ەكەندىگى بەلگىلى بولدى.
الماتى قالالىق سوتىنىڭ مالىمەتىنشە، ەسىرتكىگە ماسايعان كولىك جۇرگىزۋشى اكىمشىلىك جاۋاپقا تارتىلدى. ول 20 تاۋلىككە قاماۋعا الىنىپ، 7 جىلعا كولىك جۇرگىزۋ قۇقىعىنان ايرىلدى. سوت وتىرىسىندا قۇقىق بۇزۋشى ءىس ماتەريالدارىندا باياندالعان فاكتىلەردى راستاپ، وكىنەتىنىن ايتقان.
ايتا كەتسەك، پابليكتەر رەسمي اقپاراتتا «ا. ەسىمدى ازامات» دەپ بەرىلگەن كولىك جۇرگىزۋشىنىڭ تورەعالي ءتورالى (اليحانوۆ - رەد.) ەكەنىن جاپپاي جازدى.
