الماتىدا تاكسي باعاسىن رەتتەۋ ءۇشىن قانداي شارا قولدانىلۋدا
الماتى قالاسىنىڭ تۋريزم جونىندەگى كەڭەسى اياسىندا قالانىڭ كاسىپكەرلەر پالاتاسى جانىنان جۇمىس توبى قۇرىلدى. ونىڭ قۇرامىنا الماتى قالاسىنىڭ كاسىپكەرلەر پالاتاسى، اۆياتسيالىق كولىك پروكۋراتۋراسى، الماتى قالاسىنىڭ تۋريزم باسقارماسى، الماتى قالاسىنىڭ حالىقارالىق اۋەجايى، الماتى قالاسىنىڭ حالىقارالىق اۋەجايىنىڭ جەلىلىك پوليتسيا ءبولىمى، تۇركسىب اۋدانىنىڭ جەرگىلىكتى پوليتسيا قىزمەتى، الماتى قالاسىنىڭ مەملەكەتتىك كىرىستەر دەپارتامەنتى، الماتى قالاسىنىڭ پوليتسيا دەپارتامەنتى، قازاقستاندىق تۋريستىك قاۋىمداستىقتىڭ، الماتى قاداسىنىڭ جەكە سوت ورىنداۋشىلارىنىڭ وڭىرلىك پالاتاسى جانە ت. ب. كىردى.
«ەكى اپتا ىشىندە جۇمىس توبى تاكسيگە تاپسىرىس بەرۋ قىزمەتتەرى ۇسىناتىن تاكسيلەردىڭ قۇنىن تالداپ، تاكسيمەن ءجۇرۋدىڭ ورتاشا باعاسىن ەسەپتەدى. الماتىدا جولاۋشىلاردى تاسىمالداۋ تاريفتەرى باراتىن پۋنكتكە دەيىنگى قاشىقتىق پەن تاكسي كلاسىنا بايلانىستى 1200-دەن باستاپ 12000 تەڭگەگە دەيىن وزگەرەدى. ەڭ جوعارى باعا - اۋەجاي تەرمينالىنان «شىمبۇلاق» تاۋ شاڭعىسى كۋرورتىنا دەيىنگى تاكسيدىڭ پرەميۋم سەگمەنتىندە كورسەتىلەدى.
ايتۋ كەرەك، بۇل تۇراقتى باعالار ەمەس، تەك جولاۋشىلارعا ۇسىنىلاتىن باعالار. تاكسي قۇنى اۋا-رايى، سۇرانىس پەن باسقا دا دەرەكتەرگە قاتىستى وزگەرۋى مۇمكىن. ۇسىنىلعان باعالاردى ەسكەرە كەلە، جولاۋشىلار باعا ساياساتىن تۇسىنە الادى»، - دەپ حابارلادى الماتى اكىمدىگى.
تۋريستەرگە ارنالعان ۇسىنىستاردى ازىرلەۋدىڭ ماقساتى - تاكسي جۇرگىزۋشىلەرىنىڭ زاڭسىز ارەكەتتەرىن رەتتەۋ بولىپ تابىلادى. سونداي- اق، اتالعان جۇمىس توبى قالالىق ايماقتاردى جانە ۇسىنىلاتىن باعالاردى قوسا العاندا، رەسمي تاكسي وپەراتورلارىنىڭ قىزمەتتەرىنىڭ تاريفتەرىن كورسەتە وتىرىپ، اقپاراتتىق ستەندتەر مەن بۋكلەتتەر ازىرلەدى. الماتى اكىمدىگى، سونداي- اق، كەدەندىك باقىلاۋ ايماعىندا شەتەل ازاماتتارىنىڭ پاسپورتتارىنا اقپاراتتىق قوسىمشا پاراقتاردى تاراتۋ كوزدەلگەنىن مالىمدەدى.
