استانادا بالالار اراسىندا قىزىلشا اۋرۋى كوبەيگەن
بيىل 13-ماۋسىمداعى جاعداي بويىنشا استانا قالاسىندا 34 بالا قىزىلشامەن اۋىرعان. ولاردىڭ اتا- اناسى ق ك پ (قىزىلشاعا، قىزامىققا جانە پاروتيتكە قارسى ارالاس ۆاكتسينا) جوسپارلى ەگۋدەن باس تارتتى.
وكىنىشكە قاراي، اتا- انالاردىڭ ۆاكسيناتسيادان باس تارتۋى بالانىڭ دەنساۋلىعىنا عانا ەمەس، اينالاسىنداعى جاقىن ادامدارعا دا قاۋىپ توندىرەدى. مىسالى، قالانىڭ 2 مەكتەپكە دەيىنگى بالالار ۇيىمىندا قىزىلشامەن توپتىق اۋرۋ جاعدايى تىركەلگەن. ءبىرىنشى جاعدايدا قىزىلشامەن اۋىرعان بالا اۋرۋدى ۆاكسينا الماعان 8 بالاعا جۇقتىرادى. ال ەكىنشى جاعدايدا بالا وزىنەن باسقا ۆاكسينا الماعان 4 بالاعا جۇقتىردى. بارلىق ناۋقاس اتا- اناسىنىڭ ۆاكتسيناتسيادان باس تارتۋىنا بايلانىستى ۆاكسينا الماعان. بۇدان كەيىن بالالار «قىزىلشانىڭ تيپتىك ءتۇرى» دياگنوزىمەن اۋرۋحاناعا ءتۇستى. ولاردىڭ سىرقاتى كۇردەلى دارەجەدە وتكەن، ارى قاراي ءورشۋ قاۋپى بار.
قازاقستانداعى ءاربىر بالا ۆاكسينا الۋعا قۇقىعى بار. مەملەكەت بالانى قورعاۋ ءۇشىن قارجىلاي قامتاماسىز ەتەدى جانە اتا- انالاردىڭ ۆاكسيناتسيادان باس تارتۋى بالانىڭ قۇقىعىن بۇزۋمەن تەڭ.
استانا قالاسىنىڭ سانيتارلىق- ەپيدەميولوگيالىق باقىلاۋ دەپارتامەنتى قىزىلشامەن اۋىرعان بالالاردىڭ ساۋ ۇجىمدا بولۋ قۇقىعىن بۇزعانى ءۇشىن، جوسپارلى پروفيلاكتيكالىق ەكپە الماعان جانە ۇجىمدىق يممۋنيتەتتىڭ شەكتى دەڭگەيىنە جەتپەگەن مەكتەپكە دەيىنگى بالالار ۇيىمدارىن اكىمشىلىك جاۋاپكەرشىلىككە تارتتى.
«مەكتەپكە دەيىنگى ۇيىمداردا ۇجىمدىق يممۋنيتەت توپتاعى بالالاردىڭ جالپى سانىنىڭ كەمىندە %90 دەڭگەيىندە ساقتالۋى ءتيىس. جوسپارلى پروفيلاكتيكالىق ەكپە الماعان بالالاردى مەكتەپكە دەيىنگى ۇيىمدارعا جىبەرۋ ولاردىڭ %10 دان اسپايتىن توپتارداعى ۇلەسى جاسالعان كەزدە عانا جۇزەگە اسىرىلادى.
ءبىزدىڭ ەلىمىزدە كوپتەگەن جىلدار بويى ءۇندىستاندا شىعارىلعان قىزىلشاعا، پاروتيتكە جانە قىزامىققا قارسى ءتىرى ۆاكسينا (PDA ۆاكتسيناسى) پايدالانىلادى. ۆاكتسينا ءوز- ءوزىن دالەلدەدى جانە بۇل ۆاكسينانىڭ تيىمدىلىگى %95-97 جەتەدى. سوندىقتان اتا- انالاردان جوسپارلى پروفيلاكتيكالىق ەكپەدەن باس تارتپاۋىن سۇرايمىز. ويتكەنى بالالارىڭىزدىڭ دەنساۋلىعى ءسىزدىڭ قولىڭىزدا»، - دەدى سانيتارلىق- ەپيدەميولوگيالىق باقىلاۋ دەپارتامەنتى باسشىسىنىڭ ورىنباسارى.
ۆاكسيناتسيادان باس تارتۋ جۇقپالى اۋرۋدان قاتتى زارداپ شەگۋگە اكەلۋى مۇمكىن. مىسالى، پوليوميەليتپەن اۋىرعان كەزدە پاراليچ دامۋى مۇمكىن، قىزىلشا سوقىرلىق پەن پانەنتسەفاليت تۋدىرۋى مۇمكىن (ميدىڭ زاقىمدانۋى سالدارىنان دەگراداتسيا جانە ءولىم) ، ۇلداردا پاروتيت - بەدەۋلىككە، جۇكتى ايەلدەردە قىزامىق - ۇرىقتىڭ تۋا ءبىتتى دەفورماتسياسىنا اپارۋى مۇمكىن.
ايتا كەتەيىك، بيىل استانا قالاسىنىڭ 58 تۇرعىنى قىزىلشامەن اۋىرعان، ونىڭ 48ءى - بالا. ونىڭ ىشىندە 9 بالا مەديتسينالىق سەبەپكە بايلانىستى ەكپە سالدىرماسا، 34 نەمەسە %71 ى اتا- اناسىنىڭ باس تارتۋ سەبەبىنەن قىزىلشاعا قارسى ەكپە الماعان.
