ەۋرووداق الەمدە ءبىرىنشى بولىپ جاساندى ينتەللەكتتەن قورعانۋ تۋرالى زاڭ قابىلدايدى
زاڭدا جي جۇيەلەرى ەۋروپالىق ازاماتتار مەن تۇتىنۋشىلار ءۇشىن تاۋەكەل دارەجەسى بويىنشا توپتارعا بولىنەدى جانە ءار توپ ءۇشىن ءوز شەكتەۋلەرى مەن باقىلاۋ شارالارى ەنگىزىلگەن. مىسالى، ادامداردىڭ ساناسىنا اسەر ەتۋ ءۇشىن قۇرىلعان جۇيەلەر، سونداي-اق ناقتى ۋاقىت رەجيمىندە جۇمىس ىستەيتىن بيومەتريالىق تانۋ جۇيەلەرىنە تىيىم سالىنادى. ChatGPT ءتارىزدى كونتەنت جاسايتىن جۇيەلەر ءوز ونىمدەرىن ناقتى بەلگىلەپ، ونى ءتىرى ادامداردىڭ شىعارماشىلىعى رەتىندە كورسەتپەۋى كەرەك.
«ەۋروپارلامەنت دەپۋتاتتارى جاساندى ينتەللەكت جۇيەلەرىنىڭ ادامداردىڭ باقىلاۋىندا بولۋىن، ولاردىڭ ءقاۋىپسىز، اشىق، قاداعالاناتىن، پايدالانۋشىلاردى كەمسىتپەۋىن جانە قورشاعان ورتانى قورعاۋعا ىقپال ەتۋىن قامتاماسىز ەتكىسى كەلەدى»، - دەپ ءتۇسىندىردى ەۋروپارلامەنتتىڭ باسپا ءسوز قىزمەتىنەن مامىر ايىندا زاڭ جوباسىن ازىرلەۋ بارىسىندا.
13- ماۋسىمدا وتكەن پىكىرتالاس كەزىندە ەۋروپارلامەنت دەپۋتاتتارى بەتتى تانۋ جۇيەلەرى تۋرالى تارماقتارعا كوپ كوڭىل ءبولدى. جوبادا مۇنداي جۇيەلەردى تەك «پوستفاكتۋم» (ناقتى ۋاقىت رەجيمىندە ەمەس)، تەك قىلمىسكەرلەردى، تەرروريستەردى جانە جوعالعان ادامداردى ىزدەۋ ءۇشىن جانە تەك سوت شەشىمىمەن قولدانۋعا رۇقسات بەرۋ ۇسىنىلادى. ەۋرودەپۋتاتتارىنىڭ كوپشىلىگى مۇنداي شەشىمگە داۋىس داۋىس بەرگەن. ءبىراق كەيبىرى بەت-الپەتتى تانۋ جۇيەلەرىنە مۇلدەم تىيىم سالۋعا شاقىرادى.
