ارىستانبەك مۇحامەدي ۇلىنىڭ ءوزىن ولتىرمەك بولعانى راستالدى
مۇحامەدي ۇلىنىڭ جۇبايى سول كەزدە اۋرۋحاناعا جەدەل جەتكىزىلگەنىمەن، تولىق ەمدەلىپ شىعۋىنا مۇمكىندىك بەرىلمەدى دەپ شاعىم ايتتى.
«مەن كۇيەۋىمنىڭ دەنساۋلىعىنا الاڭدايمىن. قازىر بۇلشىق ەتتەرى قۇرىسىپ، وزدىگىمەن كەيدە ءجۇرىپ-تۇرا الماي قالادى دارىگەرگە كورسەتەيىك دەپ، ءۇي قاماققا جىبەرۋدى بىرنەشە مارتە سۇرادىق. ءبىزدىڭ تالابىمىز قاناعاتتاندىرىلماي جاتىر»، - دەدى ارىستانبەك مۇحامەدي ۇلىنىڭ ايەلى عاليا ىسقاقوۆا.
مۇحامەدي ۇلى كەشەگى سوت وتىرىسىندا ءبىراز مالىمدەمە جاسادى. ونىڭ ايتۋىنشا، ۇرلانعان اقشاعا ەش قاتىسى جوق. «قۇجاتتاردا قويىلعان بارلىق قول دا مەنىكى ەمەس» دەپ وتىر. سوندىقتان ارنايى ساراپتامادان تاعى ءبىر رەت وتكىزۋدى سۇرايدى.
ارىستانبەك مۇحامەدي ۇلىنا «التىن ادامنىڭ» الەم مۇراجايلارىنداعى شەرۋى» حالىقارالىق كورمەسىن وتكىزۋگە بولىنگەن بيۋجەتتىڭ ميلليوندارىن ۇرلادى دەپ ايىپتالعان، ونى ءوزى مويىنداماي وتىر.
«مىنا قۇجاتتىڭ ءبارىن كورگەندە تاڭعالدىم. «مىناۋ مەنىڭ قولىم ەمەس قوي» دەۋمەن بولدىم. موينىما ىلىنگەن 221 ميلليون تەڭگەنى جىمقىردى دەگەن ايىپپەن كەلىسپەيمىن. سوڭىنا دەيىن كۇرەسەمىن. ماعان قازىر جان-جاقتى قىسىم جاسالىپ جاتىر. كامەرانىڭ وزىندە اسا اۋىر قىلمىس جاساعان ادامدارمەن وتىرامىن. ونىڭ اراسىندا قىلمىس الەمىندە اتى شىققانى، تۇرمەگە ورالعانى دا بار»، - دەدى ارىستانبەك مۇحامەدي ۇلى.
