قازاقستاندا ەت پەن ءسۇت يمپورتى ازايىپ كەلەدى

بۇل تۋرالى پرەمەر-مينيستر ءاليحان سمايىلوۆ ايتتى، دەپ حابارلايدى قازاقپارات.

«مال باسى مەن مال شارۋاشىلىعى ونىمدەرىن ۇلعايتۋ ءۇشىن بيىل 108 ميلليارد تەڭگە ءبولىنىپ وتىر. بۇل شارالار مال مەن قۇس سانىنىڭ ارتۋىنا، مال شارۋاشىلىعى ونىمدەرىنىڭ وندىرىسىنە وڭ اسەرىن تيگىزەدى. ناتيجەسىندە وسى سالاعا سالىنعان ينۆەستيتسيا ۇلعايىپ، وتكەن جىلى %67 ءوسىپ، 100 ميلليارد تەڭگەدەن استى»، - دەدى پرەمەر-مينيستر ۇكىمەتتىڭ بۇگىنگى وتىرىسىندا.

ونىڭ ايتۋىنشا، مال شارۋاشىلىعى سالاسىنىڭ الەۋمەتتىك ماڭىزى بار ءبىرقاتار ونىمدەرى بويىنشا يمپورتقا تاۋەلدىلىك ايتارلىقتاي تومەندەگەن. يمپورت ءسۇت ءوندىرىسى بويىنشا %45 تەن %39 كە دەيىن، قۇس ەتىنىڭ ءوندىرىسى بويىنشا %51 تەن %32 كە دەيىن ازايعان.

«ماڭىزدى مىندەت - مال شارۋاشىلىعى ونىمىندەگى وتاندىق ءوندىرىستىڭ ۇلەسىن ارتتىرىپ، ازىق-تۇلىك قاۋىپسىزدىگىن قامتاماسىز ەتۋ. ول ءۇشىن ءبىرقاتار پروبلەمالىق ماسەلەلەردى شەشۋ قاجەت. سالاداعى ءوسىمدى تولىق قامتاماسىز ەتۋگە مۇمكىندىك بەرمەيتىن ەڭ باستى كەدەرگى - جەمشوپ ءوندىرىسى. اۋىسپالى ەگىستەگى، ءبىرىنشى كەزەكتە سۋارمالى جەرلەردەگى جەمشوپ داقىلدارىنىڭ ۇلەسىن كەڭەيتۋدى جەرگىلىكتى اتقارۋشى ورگاندار ءتيىستى دەڭگەيدە جۇرگىزبەي وتىر»، - دەدى ءا. سمايىلوۆ.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى