ورتەنگەن ورماندى قالاي قالپىنا كەلتىرۋگە بولادى - ماماننىڭ پىكىرى
وندا اعاش پەن بۇتانىڭ 100 دەن استام ءتۇرى وسىرىلەدى. بۇل پيتومنيكتەردىڭ جۇمىسى جانە ورتەنگەن ورمان القاپتارىندا اعاش وتىرعىزۋ بارىسى جايىندا وبلىستىق تابيعي رەسۋرستار جانە تابيعاتتى پايدالانۋدى رەتتەۋ باسقارماسىنىڭ ورمان شارۋاشىلىعى جانە ەرەكشە قورعالاتىن تابيعي اۋماقتار ءبولىمىنىڭ باسشىسى ءادىل قانتايەۆ ايتىپ بەردى، دەپ حابارلايدى قازاقپارات تىلشىسىنە.
ماماننىڭ ايتۋىنشا، اعاش وتىرعىزۋ شەبەرلىكتى جانە ۇزاق ۋاقىتتى قاجەت ەتەتىن كۇردەلى شارۋا.
«اۋەلى ءبىز كوشەتتەردى پيتومنيكتەردە ءوسىرىپ الامىز، سودان كەيىن عانا اعاش رەتىندە وتىرعىزامىز. اعاش ول ادام سياقتى. ونى كەز كەلگەن جەرگە وتىرعىزا بەرۋگە بولمايدى. ول جەرسىنىپ وسپەي قالۋى مۇمكىن. مىسالى، وڭتۇستىك قازاقستاندا ءبىزدىڭ كوشەتتەر تامىر جايمايدى، جەرسىنبەيدى. سول سياقتى، ورتەنگەن ورماننىڭ اۋماعىنا دا كوشەت وتىرعىزۋعا دا ۇلكەن شەبەرلىك ءارى ۋاقىت كەرەك. ەگەر ءورت شىعىپ، ورمان تولىعىمەن ورتەنىپ كەتسە، الدىمەن سول جەردە ورتەنگەن اعاشتاردان تازارتىپ الۋ كەرەك. ەگەر ءورتتىڭ اۋدانى ۇلكەن بولسا، زالال ەسەپتەلەدى، سودان كەيىن كۇيگەن اعاشتتاردى كەسۋگە رۇقسات بەرىلەدى. بۇل اعاشتار ءبارى كەسىلىپ الىنادى، ال بۇل ۋاقىتتى قاجەت ەتەدى. ءبارى بولعان سوڭ كۇيگەن جەردەگى توپىراق وڭدەلىپ بارىپ، اعاش وتىرعىزىلادى»، - دەپ ءتۇسىندىردى ءادىل قانتايەۆ.
ول اتاپ وتكەندەي، مەملەكەت باسشىسىنىڭ جولداۋىنداعى بەس جىل ىشىندە 2 ميللياردتان استام اعاش وتىرعىزۋ تۋرالى مىندەتتەردى ورىنداۋ باعىتىندا اقمولا وبلىسىندا 2021-2025-جىلدار ارالىعىندا 150 ميلليون ءدۇپ قىلقان جاپىراقتى جانە جاپىراقتى اعاش وتىرعىزۋ جوسپارلانعان.
«جىل سايىن ورمان شارۋاشىلىعى مەكەمەلەرىنىڭ 13 ورمان پيتومنيگىندە 10 ميلليوننان استام اعاش (1-2 جاس) جانە بۇتا كوشەتتەرى (3 جاستان اسقان) وسىرىلەدى»، - دەپ تولىقتىردى ءادىل قانتايەۆ.
وسى رەتتە، 2023-جىلى ورمان پيتومنيكتەرىندەگى 47 گەكتار اۋماققا 13 توننادان استام قىلقان جاپىراقتى جانە جاپىراقتى اعاش كوشەتتەرى ەگىلىپ، 237 توننا قاراعاي بۇرشىگى جينالدى. پيتومنيكتەردەگى اعاش مەن بۇتالاردىڭ 100 دەن استام ءتۇرى وسىرىلەدى.
«ساندىقتاۋ اۋدانىندا 1976 -جىلى قۇرىلعان مارالدى ورمان شارۋاشىلىعى مەكەمەسىندە قاراعاي، ارشا، باتىس تيۋجاسى، ءسىبىر شىرشاسى، قايىڭ، قاراعاش، ۇيەڭكى سياقتى اعاش تۇرلەرى وسىرىلەدى. سونىمەن بىرگە، تسينكوفيل، سپيرەيا، گورتەنزيا، دەرەن سياقتى بۇتا تۇرلەرى بار»، - دەيدى مارالدى ورمان شارۋاشىلىعى مەكەمەسى ديرەكتورىنىڭ ورىنباسارى ارمان ابەنوۆ.
كوشەتتىڭ قۇنى، وتكەن جىلعى تۇگەندەۋگە سايكەس، 10 تەڭگەنى قۇرايدى، ال كوشەتتەردىڭ باعاسى اعاشتىڭ ءتۇرى مەن بيىكتىگىنە بايلانىستى جانە ورتاشا ەسەپپەن 2 دەن 50 مىڭ تەڭگەگە دەيىن وزگەرەدى.
ايتا كەتسەك، بۇدان بۇرىن اقمولا وبلىسىندا 120 دان استام ادام ورمان ءورتىن سوندىرگەنىن جازعان ەدىك.
