ەكولوگيا مينيسترلىگى اباي وبلىسىنداعى ءورت تۋرالى: ەلدى مەكەندەرگە قاۋىپ ءتونىپ تۇرعان جوق

مينەرالداندىرىلعان جولاقتار جاساۋ جۇمىستارى قيىن بولۋىنا بايلانىستى توقتاتىلدى. ەلدى مەكەندەرگە قاۋىپ جوق.

بۇل مالىمەتتەردى بۇگىن ق ر ەكولوگيا جانە تابيعي رەسرۋستار مينيسترلىگى Telegram كانالىنا جاريالادى، دەپ حابارلايدى قازاقپارات.

ءورتتى سوندىرۋگە ت ج م، ورمان شارۋاشىلىعى كوميتەتىنەن، جەرگىلىكتى اتقارۋشى ورگانداردان جانە قورعانىس مينيسترلىگىنەن 1500 گە جۋىق ادام، 300 دەن استام بىرلىك تەحنيكا جۇمىلدىرىلعان.

سونىمەن قاتار، ءورت اۋماعىن اەروۆيزۋالدى تەكسەرۋ جانە ءورت وشاقتارىنا اۋەدەن سۋ توگۋدى جۇزەگە اسىرۋ ءۇشىن 14 تىكۇشاق تارتىلدى. ءورتتى ءسوندىرۋ جۇمىستارى باستالعاننان بەرى ءورت وشاقتارىنا اۋەدەن 777 رەت سۋ توگىلدى، جالپى كولەمى 2000 نان استام توننانى قۇرايدى.

كەشە مەتەوجاعدايدىڭ وزگەرۋىنە بايلانىستى (جەلدىڭ ەكپىنى سەكۋندىنا 18 مەترگە دەيىن) ءورت تومەنگى بولىكتە ءوربىپ ءورت وشاعىنان تاليتسا اۋىلىنا (تۇرعىندار الدىن الا ەۆاكۋاتسيالاندى) قاراي باعىت الىپ، اۋىلدى قورعاۋعا ءورت تەحنيكاسى جۇمىلدىرىلعان بولاتىن. ءورت تاليتسا اۋىلىنىڭ شىعىس جاعىنان دالاعا قاراي ءوربىپ، ءورت ءسوندىرىلدى.

توتەنشە جاعدايلار ءمينيسترى گەنەرال- مايور سىرىم ءشارىپحانوۆ وقيعا ورنىنان ءورت ءسوندىرۋ جۇمىستارىن ۇيلەستىرۋدە.

قازىرگى ۋاقىتقا دەيىن جەدەل جەلىگە 104 قوڭىراۋ ءتۇستى. ت ج م جانە ت ج د جەدەل جەلى تەلەفوندارى: 87172533284, 87222353831.

«قازگيدرومەت» ا ق دەرەكتەرى بويىنشا 11-ماۋسىم كۇنى: جاۋىن- شاشىنسىز، سولتۇستىك- باتىس، سولتۇستىك 9-14 م/س جەل، ەكپىنى 15-20 م/س بولادى دەپ كۇتىلۋدە، كۇندىز اۋا تەمپەراتۋراسى 25-30 گرادۋس.

13-ماۋسىمدا: جاۋىن- شاشىنسىز، سولتۇستىك- باتىس، سولتۇستىك 9-14 م/س جەل، ەكپىنى 15-20 م/س دەيىن بولادى دەپ كۇتىلۋدە، اۋا تەمپەراتۋراسى تۇندە 12-17 گرادۋس، كۇندىز 27-32 گرادۋس.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى