جالپىۇلتتىق ازا تۇتۋ كۇنى: استانادا ەلشىلىكتەر تۋلارىن ءتۇسىرىپ قويدى
وسى ورايدا استاناداعى كەيبىر مەملەكەتتەردىڭ ەلشىلىگى قازاقستانمەن ىنتىماقتاستىقتىڭ بەلگىسى رەتىندە تۋلارىن جارتىلاي ءتۇسىردى، دەپ حابارلايدى قازاقپارات ءتىلشىسى.
اباي وبلىسىنداعى الاپات ورمان ورتىنەن 14 وتانداسىمىز كوز جۇمدى. كەشە مەملەكەت باسشىسى سەمەيدە ورمانشىلاردىڭ وتباسى مۇشەلەرىمەن جانە جاقىندارىمەن كەزدەسىپ، 12-ماۋسىم ەلىمىزدە جالپىۇلتتىق ازا تۇتۋ كۇنى بولىپ جاريالاناتىنىن جەتكىزگەن ەدى.
«وسى قايعىلى جاعدايعا كىنالىلەردىڭ ءبارى زاڭ بويىنشا جاۋاپقا تارتىلادى. دۇيسەنبى كۇنىن ەلىمىز بويىنشا جالپىۇلتتىق ازا تۇتۋ كۇنى دەپ جاريالادىم. ءبىز قازا تاپقان ازاماتتاردى ەسكە الامىز. سابىر ساقتاپ، بەكەم بولىڭىزدار. قۇقىق قورعاۋ ورگاندارى مەن مينيسترلىكتەر تاراپىنان بولسىن، بارلىق سالا بويىنشا ءتيىستى شارالار قابىلدانادى. ءقازىر كەڭەس وتكىزەمىن. بۇل جاعدايدان مىندەتتى تۇردە ءتيىستى قورىتىندى شىعارامىز»، - دەگەن ەدى قاسىم- جومارت توقايەۆ اباي جۇرتىمەن كەزدەسە وتىرىپ.
قازاقستاندىقتاردىڭ قايعىسىنا ورتاقتاسىپ، ىنتىماقتاستىق بەلگىسى رەتىندە قولداۋ بىلدىرگەن ەلدەردىڭ اراسىندا قىتاي، ا ق ش، وزبەكستان، تۇركيا جانە بىرىككەن اراب امىرلىكتەرىنىڭ ەلشىلىكتەرى بار. اتالعان ەلدەر مەملەكەتتىك تۋلارىن جارتىلاي ءتۇسىردى.
سونداي- اق، جالپىۇلتتىق ازا تۇتۋ كۇنىندە بىرنەشە ەل پرەزيدەنتى مەملەكەت باسشىسى قاسىم- جومارت توقايەۆپەن تەلەفون ارقىلى سويلەسىپ، قازاقستاندىقتاردىڭ قايعىسىنا ورتاقتاستى.
اقوردا حابارلاعانداي، وزبەكستان پرەزيدەنتى شاۆكات ميرزيەيەۆ اباي وبلىسىنداعى ءورت سالدارىنان ادامداردىڭ قازا تابۋىنا بايلانىستى مەملەكەت باسشىسىنا جانە قازاقستان حالقىنا كوڭىل ايتتى. شاۆكات ميرزيەيەۆ قازا تاپقان ازاماتتاردىڭ وتباسىنىڭ قايعىسىنا ورتاق ەكەنىن جەتكىزدى.
ودان بولەك، تۇركيا پرەزيدەنتى رەجەپ تايپ ەردوعان مەملەكەت باسشىسىمەن تەلەفون ارقىلى سويلەسىپ، اباي وبلىسىنداعى الاپات ءورت سالدارىنان ادامداردىڭ قازا تابۋىنا بايلانىستى قاسىم- جومارت توقايەۆقا جانە باۋىرلاس قازاقستان حالقىنا كوڭىل ايتتى.
