بۇگىن - ەلىمىزدە جالپى ۇلتتىق ازا تۇتۋ كۇنى
8-ماۋسىم كۇنى سەمەي ورمان رەزەرۆاتىنان ءورت شىقتى. توتەنشە جاعدايدىڭ العاشقى ساتىنەن باستاپ ءورت سوندىرۋشىلەر مەن قۇتقارۋشىلار جۇمىسقا كىرىسىپ، مىندەتتەرىن مۇلتىكسىز وتەۋدە. الاپات ءورتتىڭ اۋقىمىنا بايلانىستى سەمەي قالاسىندا توتەنشە جاعداي جاريالاندى. ماماندار ءتىلسىز جاۋمەن ءالى كۇرەسىپ جاتىر.
سەمەي ورمانىنداعى ءورت اۋماعى باسىندا شامامەن 20 گەكتاردى قۇراعان، كەيىن جالىن ءورشي ءتۇستى.
ورمان ءورتى ۋسپەن، پودنەبەسنوە، بارىشيەۆكا اۋىلدارىنا قاۋىپ توندىرەتىندىكتەن تۇرعىندار جەدەل تۇردە ەۆاكۋاتسيالاندى. بارلىعى 316 ادام كوشىرىلگەن.
سونداي- اق، ماماندار ءورت ءسوندىرۋ اۋا رايىنىڭ قولايسىزدىعىنا بايلانىستى قيىنداپ كەتكەنىن ايتتى.
9-ماۋسىمدا سەمەيدە ورمان ورتىنە بايلانىستى توتەنشە جاعداي جاريالاندى.
سول كۇنى ۇكىمەتتىڭ باسپا ءسوز قىزمەتى اباي وبلىسىنداعى ورمان ءورتىن سوندىرۋمەن اينالىسىپ جاتقان 14 مامانمەن بايلانىس ءۇزىلىپ، ولاردى ىزدەستىرۋ شارالارى جۇرگىزىلىپ جاتقانىن حابارلادى.
ساناۋلى ساعاتتان سوڭ سەمەي ورمانىنداعى ءورتتى سوندىرۋگە جۇمىلدىرىلعان 3 ماماننىڭ قازا تاپقانى جانە 11 قىزمەتكەردى ىزدەۋ جۇمىسى جۇرگىزىلىپ جاتقانى تۋرالى سۋىق حابار جەتتى.
توتەنشە جاعدايدىڭ ۋشىعىپ، ءورتتىڭ بەلەڭ الۋىنا بايلانىستى سەمەيدە جەدەل جەلى ىسكە قوسىلدى.
ايتا كەتسەك، 11-13-ماۋسىم كۇندەرى پرەزيدەنتتىڭ ۆەتنامعا رەسمي ساپارى جوسپارلانعان ەدى. اباي وبلىسىنداعى توتەنشە جاعدايعا بايلانىستى مەملەكەت باسشىسىنىڭ جۇمىس ساپارى كەيىنگە شەگەرىلدى.
سونداي- اق، اقوردادان مەملەكەت باسشىسىنىڭ شۇعىل كەڭەس وتكىزىپ، اپاتتان زارداپ شەككەن ازاماتتارعا كومەك كورسەتۋ شارالارىن قابىلداۋ ءۇشىن اباي وبلىسىنا باراتىنى حابارلاندى.
10-ماۋسىمدا تۇستە سەمەي ورمانىنداعى ءورتتىڭ اۋماعى 60 مىڭ گەكتاردان اسىپ كەتكەنى بەلگىلى بولدى. ءتىلسىز جاۋمەن كۇرەس ءۇش باعىتتا ءجۇردى.
سول كۇنى كەشكە قاراي توتەنشە جاعدايلار مينيسترلىگى ورمان ورتىنەن قايتىس بولعانداردىڭ سانى 14 كە جەتكەنىن حابارلادى.
اباي وبلىسىنداعى ءورت ءسوندىرۋ جەدەل شتابىنىڭ مالىمەتىنشە، ىزدەۋ جۇمىستارى بارىسىندا تاعى 11 قازا تاپقان ادامنىڭ دەنەسى تابىلعان.
ارادا كوپ ۋاقىت وتپەي ورتتەن كوز جۇمعان ورمانشىلاردىڭ ءتىزىمى جاريالاندى.
ەسكە سالا كەتسەك، «سەمەي ورمانى» رەزەرۆاتىندا بولعان ءىرى ورمان ءورتىن جويۋ كەزىندە نوۆوشۋلبا فيليالىنىڭ 14 قىزمەتكەرىمەن بايلانىس ءۇزىلىپ، حابار- وشارسىز قالعان بولاتىن.
كەشە ق ر پرەزيدەنتى قاسىم- جومارت توقايەۆ جۇمىس ساپارىمەن اباي وبلىسىنا باردى.
ساپار بارىسىندا پرەزيدەنت ورمان القاپتارىنداعى ءورت ءسوندىرۋ جۇمىستارىمەن تانىسىپ، شۇعىل ارەكەت ەتۋ شتابىنىڭ وتىرىسىن وتكىزدى جانە ءورت كەزىندە قازا تاپقان ورمان شارۋاشىلىعى قىزمەتكەرلەرىنىڭ تۋىستارىمەن كەزدەستى.
مەملەكەت باسشىسى سەمەيدە ورمانشىلاردىڭ وتباسى- جاقىندارىمەن كەزدەسۋدە 12 -ماۋسىم ەلىمىزدە جالپىۇلتتىق ازا تۇتۋ كۇنى بولىپ جاريالاناتىنىن جەتكىزگەن ەدى.
- وسى قايعىلى جاعدايعا كىنالىلەردىڭ ءبارى زاڭ بويىنشا جاۋاپقا تارتىلادى. دۇيسەنبى كۇنىن ەلىمىز بويىنشا جالپى ۇلتتىق ازا تۇتۋ كۇنى دەپ جاريالادىم. ءبىز قازا تاپقان ازاماتتاردى ەسكە الامىز. سابىر ساقتاپ، بەكەم بولىڭىزدار. قۇقىق قورعاۋ ورگاندارى مەن مينيسترلىكتەر تاراپىنان بولسىن، بارلىق سالا بويىنشا ءتيىستى شارالار قابىلدانادى. ءقازىر كەڭەس وتكىزەمىن. بۇل جاعدايدان مىندەتتى تۇردە ءتيىستى قورىتىندى شىعارامىز، - دەدى قاسىم- جومارت توقايەۆ.
