اباي وبلىسىندا ءورت ايماعىندا نەلىكتەن اياق استىنان جولدى جاماپ جاتقانى بەلگىلى بولدى
ايتا كەتەيىك، كەشە جەلىدە «اباي وبلىسىنا پرەزيدەنت كەلەتىن بولعان سوڭ جولدار شۇعىل جوندەلىپ، اسفالت جامالىپ جاتقانى» جايلى حابار تارادى. تەلەارنادان ارنايى سيۋجەت تە كورسەتىلدى.
وسىعان بايلانىستى وبلىس اكىمدىگى مالىمدەمە جاسادى.
«بورودۋليحا- جەرنوۆكا- پوللوگ» اۋداندىق ماڭىزى بار جولىندا كولىك قۇرالدارىنىڭ، ونىڭ ىشىندە قۇتقارۋ قىزمەتى مەن ۆولونتەرلەردىڭ قوزعالىس قارقىنى ارتتى. وسىعان بايلانىستى ءورت ءسوندىرۋ شتابىنا كەلىپ- كەتەتىن اۆتوموبيل اعىنىن ەسكەرە وتىرىپ، قاۋىپسىز قوزعالىستى قامتاماسىز ەتۋ جانە ءجۇرۋ بولىگىن شاڭنان ارىلتۋ ماقساتىندا جولداعى شۇڭقىرلار ۋاقىتشا بىتەلدى» دەپ حابارلايدى اكىمدىك.
ەسكە سالا كەتەيىك، اباي وبلىسىندا 60 مىڭ گەكتار اۋماقتا ورمان جانىپ جاتىر.
كەشە ءورت ءسوندىرىپ ءجۇرىپ مەرت بولعان 14 ورمانشىنىڭ دەنەسى تابىلدى. ەكولوگيا مينيسترلىگى ورتتەن كوز جۇمعان ورمانشىلاردىڭ ءتىزىمىن جاريالادى.
