قورعانىس ءمينيسترى تىلشىلەردى اسكەري بولىمشەگە ساپارلاپ قايتۋعا شاقىردى
«ەڭ الدىمەن، بۇل ماسەلە تاربيەگە قاتىستى بولۋى مۇمكىن. سوندىقتان ءدال قازىر مينيسترلىكتەگى جاۋاپتى قىزمەتكەرگە ءتيىستى تاپسىرما بەرەمىن. ول ارنايى تۇردە اۆتوبۋسپەن جۋرناليستەردى جاقىن جەردەگى اسكەري بولىمشەگە جەتكىزەدى. سول جەردە تىلشىلەر ءار ساربازبەن سويلەسە الادى. جاۋىنگەرلەردىڭ قانداي جاعدايدا قىزمەت ەتىپ جاتقانىن ەمىن- ەركىن كورەسىزدەر. بۇل بولىمشەدە الدىن الا دايىندىق جاسامايمىز»، - دەدى ر. جاقسىلىقوۆ ماجىلىستە تىلشىلەر سۇراعىنا جاۋاپ بەرە وتىرىپ.
ونىڭ پايىمىنشا، جاستار اراسىندا پاتريوتيزمدى كەڭىنەن ناسيحاتتاۋ كەرەك. ءوزى ءۇشىن دە، وتباسى ءۇشىن دە، وتانى ءۇشىن دە جاۋاپكەرشىلىكتى سەزىنە بىلەتىن ادامدى تاربيەلەۋ كەرەك. تۇنگى كلۋبتا ءوزىنىڭ دەمالىسىنا كوبىرەك كوڭىل بولەتىن ادامدارعا جاۋاپكەرشىلىك جۇكتەۋ قيىنداۋ بولادى.
«ءوز حالقىڭنىڭ پاتريوتى بولساڭ، نەگە اسكەرگە بارمايسىڭ؟ ەگەر جاستار تۇنگى كلۋبتا جۇرسە، وندا ولاردىڭ كوڭىل كوتەرۋگە، ۋاقىتىن بوسقا وتكىزۋگە دەنساۋلىعى جەتكىلىكتى ەكەنىن بىلدىرەدى عوي؟ ! ءبىراق ولار وزدەرىنىڭ اسكەري بورىشىن وتەگىسى كەلمەيدى»، - دەدى قورعانىس ءمينيسترى.
سونىمەن قاتار ول قارۋلى كۇشتەردىڭ باسشىلىعى اسكەردەگى تەرىس ارەكەتتەرگە توسقاۋىل قويۋ باعىتىندا ءتيىستى ءىس- شارالاردى ۇيىمداستىرىپ جاتقانىن ايتتى.
