قازاقستاندا نە سەبەپتى ۆەيپكە تىيىم سالىنباعان

بۇگىن ماجىلىستەگى ۇكىمەت ساعاتىنان كەيىن تىلشىلەر مينيسترگە ۆەيپكە قاتىستى سۇراق قويدى.

بۇل تۇرعىدا قوعامدا ۆەيپكە تىيىم سالۋ ماسەلەسىندە ۇلتتىق ەكونوميكا مينيسترلىگى ءتيىستى شەشىم جاساماي وتىرعانى ايتىلدى.

ءوز كەزەگىندە ءا. قۋانتىروۆ اتالعان تىيىم سالۋ تەتىگىن ەنگىزۋ ازىرگە رەتتەۋشىلىك اسەردى تالداۋ قاعيداتىنا سايكەس كەلمەي تۇرعانىن جەتكىزدى.

«ادەتتەگىدەي ەكونوميكا مينيسترلىگىن كىنالاپ جاتىر. رەتتەۋشىلىك اسەردى تالداۋ دەگەن بار. بۇل رەتتە، بيزنەستىڭ مۇددەسىنە نۇقسان كەلتىرمەۋ ءۇشىن ءتيىستى زاڭنامالىق رەتتەۋ ءتارتىبى (جاڭا زاڭ جوباسى، ەرەجەلەر) وسى پروتسەستەن ءوتۋى كەرەك. ءتيىستى زاڭ جوباسىن ازىرلەيتىن ءاربىر ۋاكىلەتتى ورگان رەتتەۋشىلىك اسەردى تالداۋ پروتسەسىنەن ءوتۋى كەرەك. الايدا دەنساۋلىق ساقتاۋ مينيسترلىگى ونى جارتى جىلدان بەرى وتكىزە الماي وتىر. ءبىز ونى قايتا پىسىقتاۋ ءۇشىن بىرنەشە رەت قايتاردىق. ويتكەنى ولار مۇنى اتالعان تالداۋ پروتسەسى ەرەجەلەرىنە سايكەس جاساماعان»، - دەپ ءتۇسىندىردى ۆەدومستۆو باسشىسى.

«سونىمەن قاتار، شاعىن جانە ورتا بيزنەستى دە ويلاۋىمىز كەرەك. اتالعان مينيسترلىك ءبارىن دۇرىس جاساعاندا، ءبىز ءتيىستى قادامدى جاساۋعا دايىنبىز. ءوز باسىم ۆەيپتەرگە تىيىم سالۋدى قولدايمىن»، - دەدى ءا. قۋانتىروۆ.

بۇدان بۇرىن حابارلانعانداي، بيىل مامىر ايىندا ءماجىلىستىڭ جالپى وتىرىسىندا دەپۋتات نۇرگۇل تاۋ جاسوسپىرىمدەر اراسىندا ۆەيپتەر كەڭىنەن تاراپ جاتقانىن ايتتى.

جاقىندا دەنساۋلىق ساقتاۋ ۆيتسە- ءمينيسترى ۆياچەسلاۆ دۋدنيك ەلىمىزدە وقۋشىلاردىڭ %10 ەلەكتروندى تەمەكى نەمەسە ۆەيپ تارتىپ جۇرگەنىن ايتتى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى