اتىس قارۋى، جارىلعىش زات، كاستەت، بالتا: جولاۋشىلار ۇشاققا قانداي زاتتارمەن كىرمەك بولعان
باسپا ءسوز قىزمەتىنىڭ مالىمەتتەرىنە قاراعاندا، وسى جىلدىڭ 3 ايىندا استانا حالىقارالىق اۋەجايى 660 مىڭعا جۋىق جولاۋشىعا قىزمەت كورسەتكەن. بۇل رەتتە اۋە ايلاعىنىڭ اۆياتسيالىق قاۋىپسىزدىك قىزمەتى جولاۋشىلاردى تەكسەرۋ كەزىندە 5177 تىيىم سالىنعان زات تاركىلەدى.
ونىڭ ىشىندە، 124 بىرلىك سۋىق جانە گاز قارۋى، 66 بۇرىش قوسىلعان سپرەي مەن ەلەكتروشوكەر، 7 كاستەت، قارۋ تەكتەس 582 زات، 65 وق-ءدارى، 44 جارىلعىش زات، 24 ۋلى، كورروزيالىق جانە باسقا دا زاتتار بار. سونداي-اق جولاۋشىلاردان 72.8 ليتر تەز تۇتاناتىن سۇيىقتىقتار جانە اۋە كەمەلەرىندە تاسىمالداۋعا شەكتەلگەن 4264 ىقتيمال قاۋىپتى زات تابىلدى. كوبىنەسە بۇل بالعا، بالتا، تەسۋ جانە كەسۋگە ارنالعان قۇرالدار.
بۇدان باسقا باگاجدا جانە قول جۇگىندە دەكلاراتسيالانباعان ءىرى اقشا سومالارىن الىپ ءجۇرۋ جاعدايلارى انىقتالىپ، ۇلتتىق قاۋىپسىزدىك قىزمەتى جانە ق ر ق م مەملەكەتتىك كىرىستەر كوميتەتى سياقتى ۋاكىلەتتى قىزمەتتەرىنە جىبەرىلدى.
«2022-جىلى ەلوردالىق اۋە ايلاعى ءوز تاريحىندا العاش رەت 6 ميلليونىنشى جولاۋشىعا قىزمەت كورسەتكەنىن ەستەرىڭىزگە سالا كەتەيىك. ءوز كەزەگىندە قاۋىپسىزدىك قىزمەتى جولاۋشىلاردان 2 مىڭنان استام اتىس قارۋى مەن 67780 وق-ءدارىنى تاركىلەگەن»، - دەلىنگەن حابارلامادا.
اۋە كولىگىنىڭ ەرەكشەلىكتەرىنە بايلانىستى جولاۋشىلار اۆياتاسىمالدارىندا قاۋىپسىزدىك ماسەلەسىنە كوبىرەك كوڭىل بولىنەدى. ۇشۋ قاۋىپسىزدىگىن قامتاماسىز ەتۋ جونىندەگى مىندەتتى ءىس-شارالار كەشەنى ەكيپاج بەن جولاۋشىلارعا قاۋىپ نەمەسە زورلىق-زومبىلىق قۇرالى رەتىندە پايدالانىلۋى مۇمكىن تىيىم سالىنعان زاتتارى بار ادامداردىڭ بورتقا كىرۋىنە جول بەرمەۋگە باعىتتالعان.
جولاۋشىلاردىڭ قاۋىپسىزدىگى مەن جايلىلىعىن قامتاماسىز ەتۋ ءۇشىن الەمدىك تاجىريبەگە سايكەس جولاۋشىلاردى، قول جۇگى مەن باگاجدى قولمەن ىرىكتەپ تەكسەرۋ جۇرگىزىلەدى.
قازاقستاننىڭ اۆياتسيالىق قاۋىپسىزدىك قاعيدالارى ءاربىر رەيس جولاۋشىلارىنىڭ جالپى سانىنىڭ كەمىندە 10 پايىزىن مۇقيات تەكسەرىپ شىعۋدى تالاپ ەتەدى. بۇل ICAO حالىقارالىق قاۋىپسىزدىك ستاندارتتارىندا دا قاراستىرىلعان.
سوندىقتان استانا اۋەجايىندا 2015-جىلدان باستاپ راندومايزەر فۋنكسياسى بار اركالى مەتالل ىزدەگىشتەر پايدالانىلادى. اتالعان قۇرىلعىلار جولاۋشىلاردىڭ %10 ىن اۆتوماتتى تۇردە جانە كەزدەيسوق تارتىپپەن تاڭدايدى.
ەگەر قۇرىلعى تەكسەرۋ بارىسىندا سيگنال بەرسە، جولاۋشى رەنتگەن-تەلەديدار قوندىرعىسى ارقىلى جەكە تەكسەرۋ ءۇشىن اياق كيىمىن (قۇرامىندا مەتالل زاتتار بولماسا دا) شەشىپ، تەكسەرۋدەن ءوتۋى كەرەك. سونىمەن قاتار تەكسەرۋ قىزمەتكەرلەرى جولاۋشىنىڭ قول جۇگىن مۇقيات تەكسەرىپ، ءار زاتتى تەكسەرۋگە مىندەتتى.
وسىعان بايلانىستى جولاۋشىلار بارىنشا تۇسىنىستىك تانىتىپ، اۋەجاي ينسپەكتورلارىنىڭ زاڭدى تالاپتارىن ورىنداۋلارى قاجەت. تەكسەرۋدەن جالتارعان جولاۋشىلار «قازاقستان رەسپۋبليكاسىنىڭ اۋە كەڭىستىگىن پايدالانۋ جانە اۆياتسيا قىزمەتى تۋرالى» زاڭعا سايكەس تاسىمالداۋعا جىبەرىلمەيدى.
