بيىل ەۋرووداق ەلدەرىنە قۋاڭشىلىق قاۋپى ءتونىپ تۇر
توپىراقتاعى ىلعال بالتىق پەن سكانديناۆيادا دا ازايىپ كەتتى، دەپ حابارلايدى قازاقپارات Euronews اگەنتتىگىنە سىلتەمە جاساپ.
وڭتۇستىك ەۋروپا كۇننىڭ ىسۋىنا جانە قۋاڭشىلىقتىڭ كۇشەيەتىنىنە دايىندالىپ جاتىر. ول ەلدەردىڭ اۋىل شارۋاشىلىعىنا كەرى اسەرىن تيگىزەدى. ەڭ كوپ زارداپ شەككەن ەۋرووداققا مۇشە ەلدەر وزدەرىنە قارجىلاي كومەك كورسەتۋدى، ناقتىراق ايتقاندا قيىن كەزەڭدە فەرمەرلەرگە كومەك كورسەتۋگە ارنالعان «اگرارلىق رەزەرۆتەن» 450 ميلليون يەۆرو كولەمىندە قارجى ءبولۋدى سۇراپ جاتىر.
وسىنداي كەزەڭ كەلگەنىن يسپانيا اۋىلشارۋاشىلىق، بالىق اۋلاۋ جانە ازىق-تۇلىك ءمينيسترى لۋيس پلاناس پۋچادەس مالىمدەدى:
«بيىل ءبىز يسپانيادا گيدرولوگيا جىلى باستالعالى جاۋىن- شاشىن مولشەرى %30 تەن استام ازايعانىن بايقادىق. بۇل جايىلىم جەرلەردەگى مالداردى جەم- شوپپەن قامتاماسىز ەتۋگە، قىسقا ارنالعان ەگىنگە، جازدىق ەگىنگە دە كەرى اسەر ەتەدى. سۋ كۇشى ازايعاندىقتان سۋارۋ دا قيىن بولادى».
بريۋسسەلدەگى مينيسترلىك كەزدەسۋىندە فرانتسيا، يتاليا مەن يسپانيانىڭ اتىنان پورتۋگاليا ۇسىنعان بايانداما جاعدايدىڭ قيىن ەكەنىن كورسەتتى. ءساۋىردىڭ سوڭىندا ەۋرووداقتىڭ %21,6 اۋماعى «قۋاڭشىلىق تۋرالى ەسكەرتۋ» رەجيمىندە، ال %3,2 ى «دابىل» جاعدايىندا بولدى.
جاۋىن- شاشىننىڭ بولماۋىنان يسپانيا مەن پورتۋگاليا قاتتى شىعىنعا باتتى. بالتىق پەن سكانديناۆيا ەلدەرىندە توپىراقتاعى ىلعال مولشەرى ادەتتەگىدەن ازايىپ كەتتى.
يسپانيادا 2022 -جىلدىڭ 1-قازانى مەن 2023 -جىلدىڭ 25-ءساۋىرى ارالىعىندا جاۋىن- شاشىن جەتىسپەۋشىلىگى كولەمى ورتاشا ەسەپتەن %24 كە تومەندەگەن، ال فرانسيادا 101 دەپارتامەنتتىڭ 26 ى جاز سوڭىندا قۋاڭشىلىققا تاپ بولۋى مۇمكىن. ول پورتۋگاليانىڭ %40 تەن استام قۇرلىق اۋماعىنداعى اۋىلشارۋاشىلىعى قىزمەتىنە كەرى اسەر ەتتى.
يتاليادا قۋاڭشىلىقپەن قاتار سۋ تاسقىنى دا مال شارۋاشىلىعى، ءجۇزىم ءوسىرۋ، ءداندى داقىلدار، جەمىس-جيدەك وندىرۋگە زيانىن تيگىزىپ جاتىر. سونىمەن قاتار وزەن اتىراۋىنداعى اعىننىڭ ازايۋى سالدارىنان تەڭىزدەن تۇزدى تاناپ كوتەرىلىپ، سۋ اۋىلشارۋاشىلىعى قاجەتى ءۇشىن جارامسىز بولىپ قالادى.
