جول-كولىك وقيعاسىن توقتاتايىق: س ق و-دا پوليتسەيلەر مەن دارىگەرلەر تۇنگى رەيدكە شىقتى

س ق و پوليتسيا دەپارتامەنتى باسپا ءسوز قىزمەتىنىڭ مالىمەتىنشە، الەمدىك تاجىريبە كورسەتكەندەي، تۇنگى جولداعى اپاتتارعا كوبىنە جۇرگىزۋشىنىڭ رۋلدە ۇيىقتاپ كەتۋى سەبەپ. جۇرگىزۋشىلەردىڭ نازارىن وسى ماسەلەگە اۋدارۋ ءۇشىن ءوڭىر پوليتسەيلەرى جەدەل جاردەم قىزمەتىنىڭ ماماندارىمەن بىرگە 24-28-مامىر ارالىعىندا «جول-كولىك وقيعاسىن توقتاتايىق» اكسياسىن وتكىزدى.

تۇنگى رەيد بارىسىندا كولىك جۇرگىزۋشىلەرىنىڭ شارشاۋ دەڭگەيى تەكسەرىلدى. قان قىسىمىنىڭ، جۇرەك سوعىسىنىڭ، ساتۋراتسيانىڭ بۇزىلۋى - شارشاعاندىقتىڭ بەلگىسى. وسىنداي بەگىلەر قوستانايدان استاناعا كوكونىس تاسىمالداپ بارا جاتقان 36 جاستاعى «Mercedes» جۇك كولىگىنىڭ جۇرگىزۋشىسىنەن انىقتالدى.

ونىڭ ايتۋىنشا، ساعات 6:00-دە جولعا شىققاننان تەك ءبىر جارىم ساعات قانا ءۇزىلىس جاساعان. پەتروپاۆل قالاسى ارقىلى ءبىرىنشى رەت ءوتىپ بارا جاتقاندىقتان، ءتارتىپ ساقشىلارى جول كورسەتىپ، ونى جاقىن ماڭداعى فۋرالار توقتايتىن تۇراققا جەتكىزدى.

«تەك ءبىر تۇنگى رەيدتىك ءىس-شارادا 30-دان استام جۇرگىزۋشى تەكسەرىلدى. اۋىر جۇك كولىكتەرىنىڭ عانا ەمەس، جولاۋشى تاسىمالداۋشى جانە جەڭىل كولىكتەردىڭ جۇرگىزۋشىلەرى دە نازارعا الىندى. بۇدان بولەك، مەديتسينا قىزمەتكەرلەرى ءدارى قوبديشالارىن تەكسەردى. جول قوزعالىسىنىڭ بارلىق قاتىسۋشىلارىنا ەڭبەك پەن دەمالىس رەجيمىن ساقتاۋدى ەسكە سالامىز. قاتتى شارشاعان كۇيدە كولىك باسقارۋعا مۇلدەم بولمايدى. جول ءجۇرىسى قاعيدالارىنىڭ تالاپتارىن قاتاڭ ساقتاڭىزدار»، - دەيدى س ق و پ د جەرگىلىكتى پوليتسيا قىزمەتى باسقارماسىنىڭ باستىعى ايدىن بايماتوۆ.

جىل باسىنان س ق و-دا 64 جول-كولىك وقيعاسى تىركەلىپ، 5 ادام كوز جۇمعان، 108 ادام جاراقاتتانعان.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى