سەنات ءتوراعاسىنىڭ ورىنباسارى ينۆەستيتسيالىق كەلىسىمشارتتاردى سىنعا الدى

«ستاتيستيكا مالىمەتىنە توقتالساق، ەلىمىزدە بەكىتىلگەن ينۆەستيتسيالىق كەلىسىمشارتتار كوپ. 2017-2022-جىلدار ارالىعىندا 3,4 تريلليون تەڭگە سوماعا 351 ينۆەستيتسيالىق كەلىسىمشارت جاسالعان. ونىڭ ىشىندە 2,5 تريلليون تەڭگە شاماسىندا جۇزەگە اسىرىلىپ جاتقان 238 شارت بار. كەلىسىمشارتتار كوپ، ال ەكونوميكامىزدىڭ قۇرىلىمى يمپورتقا تاۋەلدى بولىپ قالىپ وتىر»، - دەدى و. پەرەپەچينا سەناتتا قازاقستاننىڭ ينۆەستيتسيالىق احۋالى تارتىمدىلىعى تاقىرىبىندا ءوتىپ جاتقان ۇكىمەت ساعاتىندا.

ونىڭ ايتۋىنشا، قازاقستان ەڭ ماڭىزدى قۇرىلىس ماتەريالدارىنىڭ يمپورتىنا 90 پايىزعا تاۋەلدى. سونىمەن قاتار، بيۋجەتتەن قوماقتى قارجات ءبولىنىپ، اگروونەركاسىپ كەشەنىنە سالىق جانە كەدەندىك پرەفەرەنتسيالار بەرىلگەنىنە قاراماستان، الەۋمەتتىك ماڭىزى بار ازىق-تۇلىك تاۋارلاردىڭ %56 عا دەيىن كولەمىن يمپورتتايمىز.

«ارنايى ەكونوميكالىق ايماقتارعا توقتالساق، ا ە ا- لار اۋماعىندا ونەركاسىپتىك كاسىپورىنداردى قۇرۋعا سالىنعان ينۆەستيتسيانىڭ جالپى سوماسى 1,2 تريلليون تەڭگە بولدى، ونىڭ %65 دان استامى كۆازيمەملەكەتتىك سەكتور سۋبەكتىلەرىنىڭ قاتىسۋىمەن. بۇل تۇرعىدا جەكە ينۆەستيتسيانى مەملەكەتتىك ينۆەستيتسيامەن ناقتى الماستىرۋ بولعانى بايقالىپ وتىر. وسى سالاداعى جاعداي ونەركاسىپكە جەكە ينۆەستيتسيالاردى تارتۋ دەڭگەيىنىڭ تومەندىگىن، سونداي-اق ارنايى ەكونوميكالىق ايماقتاردىڭ ەكسپورت بويىنشا باعدارىنىڭ ناشار ەكەنىن كورسەتىپ وتىر»، - دەدى سەنات ءتوراعاسىنىڭ ورىنباسارى.

ونىڭ سوزىنە قاراعاندا، ا ە ا- عا ينۆەستيتسيالاردى تارتۋعا كەدەرگى كەلتىرەتىن نەگىزگى پروبلەما ينفراقۇرىلىمنىڭ تولىق سالىنباۋىنا، مىقتى كادرلاردىڭ تاپشىلىعى جانە باسقا دا ماسەلەگە قاتىستى.

بۇدان بۇرىن حابارلانعانداي، قازاقستاندا شەتەلدىك ينۆەستيتسيانىڭ باسىم بولىگى شيكىزات سەكتورىنا باعىتتالىپ جاتىر.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى