پرەزيدەنت «قىزىلجار-ءسۇت» فەرماسىنا باردى
تاۋارلىق ءسۇت فەرماسىنىڭ ءبىرىنشى كەزەڭى 2020-جىلى ىسكە قوسىلعان.
بىلتىر كاسىپورىنعا 366 ميلليون تەڭگە ينۆەستيتسيالىق سۋبسيديا بولىنگەن جانە گەرمانيادان سيممەنتال جانە گولشتين اسىل تۇقىمدى ءىرى قارا ساتىپ اكەلىنگەن.
فەرما 60 جەرگىلىكتى تۇرعىندى تۇراقتى جۇمىسپەن قامتاماسىز ەتىپ وتىر.
پرەزيدەنت اگروونەركاسىپ كەشەنى باسشىلارىمەن جانە قاراپايىم جۇمىسشىلارمەن اڭگىمەلەستى.
ولار مەملەكەت تاراپىنان كورسەتىلىپ جاتقان جان-جاقتى قولداۋدىڭ ناتيجەسىندە سولتۇستىك قازاقستان وبلىسىندا مال شارۋاشىلىعىنىڭ دامۋى تىڭ قارقىن العانىن اتاپ ءوتتى.
پرەزيدەنت سولتۇستىك قازاقستان وڭىرىندە مال شارۋاشىلىعى ونىمدەرىنىڭ ءوندىرىس كولەمىن ارتتىرۋعا مول مۇمكىندىك بار ەكەنىن اتاپ ءوتتى.
- ءبىز مۇنداي وندىرىستىك جوبالارعا مىندەتتى تۇردە قولداۋ كورسەتەمىز. الەۋمەتتىك-كاسىپكەرلىك كورپوراتسيالار ارقىلى جەڭىلدىكپەن كرەديت بەرۋ ءوز تيىمدىلىگىن كورسەتتى. ياعني، قارجىلاندىرۋ جاعىنان ماسەلە بولماۋعا ءتيىس. ءسۇت ءوندىرىسىن ءتيىستى دەڭگەيدە ۇيىمداستىرۋ كەرەك. بۇكىل ەل بويىنشا ءوز-ءوزىمىزدى ءسۇت ونىمدەرىمەن قامتاماسىز ەتەتىن دەڭگەيگە جەتۋىمىز كەرەك، - دەدى مەملەكەت باسشىسى.
مەملەكەت باسشىسى ادال ەڭبەگىمەن ەلدى كوركەيتۋگە، حالىقتى ازىق-تۇلىكپەن قامتاماسىز ەتۋگە قوسقان ۇلەسى ءۇشىن اۋىل ەڭبەككەرلەرىنە العىس ايتتى.
پرەزيدەنت وبلىس باسشىلىعىنا جاڭا فەرمالاردى ىسكە قوسۋ جانە قولدانىستاعى شارۋاشىلىقتاردىڭ وندىرىستىك قۋاتىن ارتتىرۋ ارقىلى ءسۇت ءوندىرىسى باعىتىنداعى مال شارۋاشىلىعىن ودان ءارى دامىتۋ جونىندە تاپسىرما بەردى.
