ەۋرازياداعى ىنتىماقتاستىق ەكونوميكالىق باعىت بويىنشا دامۋعا ءتيىس - پرەزيدەنت
«رەسەي فەدەراتسياسىمەن شەكارا بويىندا ورنالاسقان سولتۇستىك قازاقستان وبلىسىنىڭ ستراتەگيالىق ماڭىزى زور. رەسەي - ءبىزدىڭ سەرىكتەسىمىز. ءبىز ە ا ە و اياسىندا دا، ەكىجاقتى دەڭگەيدە دە كەدەرگىسىز ساۋدا مەن تاۋار الماسۋ ءىسىن قامتاماسىز ەتۋ ءۇشىن تۇراقتى كەلىسسوزدەر جۇرگىزەمىز. جۋىردا ماسكەۋدە ەاەو جوعارى كەڭەسىنىڭ وتىرىسى ءوتتى. جيىندا، ەڭ الدىمەن، ءوزارا ەكونوميكالىق ءىس-ارەكەت، ينتەگراتسيا، ىنتىماقتاستىق ماسەلەلەرىمەن اينالىسۋ قاجەتتىگى تۋرالى ايتتىق. ساۋدا-ساتتىق كەدەرگىسىز جۇرگىزىلۋى كەرەك. ءبىز ءبىرىڭعاي تاۋار نارىعىن قۇرۋعا بار كۇش-جىگەرىمىزدى جۇمساۋعا ءتيىسپىز. قازاقستاندىق جۇك تاسىمالداۋشىلار تاۋاردى رەسەي نارىعىنا دا، ءۇشىنشى مەملەكەتتەردىڭ نارىقتارىنا دا كەدەرگىسىز جانە ءتيىمدى جەتكىزۋ ءۇشىن رەسەي اۋماعىنداعى ىشكى تەمىرجول تاريفتەرى قول جەتىمدى بولۋعا ءتيىس. تاعى دا قايتالاپ ايتامىن: ە ا ە و، ەڭ الدىمەن، ەكونوميكالىق ينتەگراتسيامەن، سودان كەيىن باسقا ماسەلەلەرمەن اينالىسۋى كەرەك»، - دەدى قاسىم-جومارت توقايەۆ سولتۇستىك قازاقستان وبلىسىنىڭ اۋىل شارۋاشىلىعى ونىمدەرىن وندىرۋشىلەرمەن كەزدەسۋ بارىسىندا.
مەملەكەت باسشىسىنىڭ اتاپ وتۋىنشە، يدەولوگيا، ءبىلىم بەرۋ، دەنساۋلىق ساقتاۋ، سپورت، مادەنيەت سالالارىنداعى ماسەلەلەر، ارينە، نازار اۋدارۋدى قاجەت ەتەدى. ءبىراق باسقا دا پلاتفورمالار بار.
«وندا ءبىز بارلىق ءتيىستى ەلدەرمەن تابىستى ىنتىماقتاستىق ورناتقانبىز. سوندىقتان ە ا ە و، ەڭ الدىمەن، 2015-جىلعى شارتتا بەكىتىلگەن مىندەتىن ورىندايدى دەپ سەنەمىز»، - دەدى پرەزيدەنت.
پرەزيدەنتتىڭ پايىمىنشا، كەڭ ەۋرازيالىق ايماقتاعى نەمەسە ۇلكەن ەۋرازياداعى ىنتىماقتاستىق ەكونوميكالىق باعىت بويىنشا دامۋعا ءتيىس.
«وعان ءبىز ءبارىمىز مۇددەلىمىز. ناقتى ورتاق نارىق قۇرۋ كەرەك»، - دەدى قاسىم-جومارت توقايەۆ.
