ا ق ش: «ولار ورنىنان تۇرمايدى». نەگە؟

كەزىندە «Тeambuy.cc/thread» سايتى مىناداي سۋرەتتى اقپارات جاريالاپتى:

«ا ق ش پرەزيدەنتى وباما كونگرەستە ءوزىنىڭ 70 مينۋتتىق بايانداماسىن جاساعاندا زالدا وتىرعاندار از دەگەندە 80 رەت شاپالاق سوعىپ، كوپ مارتە ورىندارىنان تۇرىپ، قۇرمەت كورسەتتى. بۇل - پرەزيدەنت ساياساتىنا كەلىسەتىندىكتەرىنىڭ بەلگىسى.»

الايدا، ءبىزدىڭ ايتپاعىمىز ول ەمەس، كەرىسىنشە زالدا وتىرعان - ەشقاشان شاپالاق سوقپايتىن، ورنىنان تۇرمايتىن ادامدار جايلى بولماق. ولار كىمدەر؟

مىنا سۋرەتتەردى ۇلكەيتىپ، انىقتاپ قاراڭىزشى، شەتكەرى جاقتا وتىرعانداردىڭ اسكەري ادامدار ەكەنىن بىردەن تانيسىز. ولاردىڭ شاپالاق سوعىپ، قوشامەت كورسەتپەيتىن سەبەبى - ا ق ش-تا اسكەريلەردىڭ ساياساتپەن ءىسى جوق. ولار تەك پرەزيدەنتتىڭ بايانداماسىندا اسكەري ىستەرگە قاتىستى ماسەلە قامتىلسا عانا قول شاپالاقتاپ، قۇرمەت بىلدىرەدى.

ال وبامانىڭ قارسى الدىندا وتىرعان ءبىر توپ كەمپىر-شال - ا ق ش-تىڭ ەڭ جوعارى سوتىنىڭ سۋديالارى. ءداستۇر بويىنشا ولار پرەزيدەنتتىڭ ءار الۋان مازمۇنداعى باياندامالارىنا شاپالاق ۇرىپ، باس شۇلعىپ، قوشەمەت جاسامايدى. ويتكەنى، بۇل مەملەكەت بيلىگىنىڭ ەڭ جوعارعى شارتى - «زاڭ الدىندا بارلىق ادام تەڭ» دەگەن پرينسيپتىڭ كورىنىسى. بالكىم، بۇل دەموكراتيانىڭ ەڭ قاراپايىم بەينەلەنۋى شىعار؟ قالاي دەگەنمەن دە ويعا قالدىرادى».

بىزدە قالاي، بارلىق مەملەكەتتىك بيلىك ورگاندارىنىڭ، اسكەريلەر مەن زاڭ ورىندارىنىڭ مىقتىلارى، دەپۋتاتتار مەن مينيسترلەر اباي اتامىز ايتپاقشى، «شىبىنداعان اتتاي بولىپ» باس شۇلعي بەرۋگە ۇيرەنگەن. جالپاقتاۋ مەن جاعىمپازدىق بەلەڭ العان جەردە وزگە تۇرماق ءوزىنىڭ زاڭدى قۇقىن اياق استى ەتەتىندەردەن ارىلۋ قيىن بولاتىن شىعار، ءسىرا!

ەسبول نۇراحمەت

«نۇر استانا» گازەتى. 2012

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى