كيىكتەن كەلگەن زالال ءۇشىن شارۋالار وتەماقى الىپ جاتقان جوق – ق ر ا ش م
«كيىكتەردىڭ ميگراتسياسى، سۋبسيديالار تولەۋ جانە اۋىل شارۋاشىلىعى تاۋارىن وندىرۋشىلەرگە كەلتىرىلگەن زالالدى قالپىنا كەلتىرۋ ماسەلەسى ءبىرىنشى رەت كوتەرىلىپ وتىرعان جوق. ءبىز جيى كەزدەسۋلەر وتكىزەمىز، وڭىرلەرگە بارامىز، سوندىقتان وسى ماسەلەنى بىرنەشە رەت كوتەردىك. ءبىز بۇل ءراسىمدى مەملەكەتتىك دەڭگەيگە شىعارۋ، ارنايى ەرەجەلەر دايىنداۋ جانە وسى پروبلەمامەن اينالىسۋ قاجەت دەپ سانايمىز»، - دەپ ءتۇسىندىردى اۋىل شارۋاشىلىعى ءمينيسترى ەربول قاراشوكەيەۆ ورتالىق كوممۋنيكاتسيالار قىزمەتىندە.
سونىمەن بىرگە، اۋىل شارۋاشىلىعى دەپارتامەنتىنىڭ باسشىسى ازات سۇلتانوۆ بۇل ماسەلە بويىنشا جۇمىس ءۇش باعىتتا جۇرگىزىلىپ جاتقانىن ايتتى.
ونىڭ سوزىنشە، العاشقى ەكى باعىت ەكولوگيا جانە تابيعي رەسۋرستار مينيسترلىگىنە بەكىتىلگەن.
«شاقىرىلعان ساراپشىلار جۇمىس ىستەپ جاتىر. قورىتىندىسى بويىنشا كەلەسى ايدىڭ باسىندا ۇسىنىستاردى ىسكە اسىرۋ جانە ماسەلەنى شەشۋ بويىنشا ارنايى جوسپار قابىلدانادى دەپ كۇتىلۋدە. بىرىنشىدەن: كيىك ميگراتسياسىن داقىلدار مەن جايىلىمدىق جەرلەردەن وتپەۋ ءۇشىن قالاي وزگەرتۋگە بولاتىنىن انىقتاۋ كەرەك. سونداي-اق، ساراپشىلار كيىك ەتىن ونەركاسىپتىك ماقساتتا پايدالانۋدى ۇسىنادى. بۇل ءبىزدىڭ قۇزىرەتىمىزگە كىرمەيدى، سوندىقتان پىكىر بەرمەيمىز. ءۇشىنشىسى - زالالدى وتەۋ ماسەلەلەرى. وتەماقى تولەۋ ءۇشىن ءتيىستى قۇزىرەتتىلىك قاجەت. زاڭ شىعارۋ پروتسەسى وتە ۇزاق ەكەنىن بىلەسىزدەر. ول ءبىز قازىر ءوتىپ جاتقان بەلگىلى ءبىر پروتسەدۋرالاردان تۇرادى. ءبىرىنشىسى - عىلىمي ۇيىمدارمەن بىرگە وتەماقى ادىستەمەسىن ازىرلەدى. قازىرگى ۋاقىتتا ۋاكىلەتتى ورگاننىڭ قۇزىرەتتەرىن زاڭنامالىق بەكىتۋ بويىنشا جۇمىس جۇرگىزىلۋدە»، - دەپ اتاپ ءوتتى ازات سۇلتانوۆ.
اۋىل شارۋاشىلىعى دەپارتامەنتىنىڭ باسشىسى فەرمەرلەردىڭ 360 مىڭ گەكتار جەرىنە زالال كەلگەنىن حابارلادى.
«نەگىزگى ءبۇلىنۋ ەگىس جۇرگىزىلمەيتىن، تۇقىم ماتەريالىنا شىعىن كەلتىرىلمەيتىن جايىلىمدىق جەرلەردە بايقالعان. ياعني، نەگىزگى زالال جايىلىمدىق جەرلەرگە كەتەدى. بۇل باعىتتا جۇمىس ىستەيتىن بولامىز»، - دەدى ازات سۇلتانوۆ.
