مينيستر دارحان قىدىرالى ءتولقۇجاتتا ۇلتقا قاتىستى وزگەرىس ەنگىزىلۋى تۋرالى ويىن ايتتى
«بيلىك ۇلت قۇرۋ دەگەن جاڭا باعدارلامانى ويلاپ تاپتى. ەندى قازاقستاندىق ەمەس - قازاق دەپ اتالادى. سونىمەن قاتار، ءتولقۇجاتتان ۇلتى دەگەن گرافانى الىپ تاستاپ، ونىڭ ورنىنا قازاقستان رەسپۋبليكاسىنىڭ ازاماتى دەپ جازباقپىز. 2010-جىلى وسىنداي ءتاسىلدى كوردىك، دوكترينا قابىلداندى. سول كەزدە ۇلت بەلسەندىلەرى قازاقتى قازاقستاندىق دەپ اتاپ جىبەرۋدەن امان الىپ قالدى. وسى جوبا دا سونىڭ كەبىن كيىپ، قۇردىمعا كەتىپ جۇرمەي مە؟»، - دەپ سۇرادى جۋرناليست سۇحبات بارىسىندا.
مينستر بۇل جەردە بىرنەشە ماسەلە تۋىندايتىنىن ايتتى.
«بىرىنشىدەن، ءتولقۇجات ماسەلە قايدان شىققانىن بىلمەيمىن. تاياۋدا وتكەن قازاقستان حالقى اسسامبلەياسىندا مەملەكەت باسشىسى وسى ماسەلەنى كوتەرگەندە بىرەگەيلىك تۋرالى ايتا وتىرىپ ەلىمىزدەگى بارلىق ەتنوس قازاق ءتىلىن مەڭگەرۋى ءتيىس، ءبىزدى شەت ەلدەردە قازاق دەپ ايتادى، سپورتشىلارىمىزدى، ەلدىڭ ماقتانىشتارىن قازاق دەپ ايتادى. سوندىقتان ءبىز ءبىر ۇلتپىز دەگەن ماسەلە كوتەردى جانە مۇنىڭ عىلىمي تۇرعىدا زەردەلەنۋى قاجەت ەكەنىن ايتتى. مەنىڭشە، بۇل وتە ماڭىزدى ماسەلە»، - دەيدى مينيستر.
دارحان قىدىرالى راسىندا 2009-جىلى قازاقستاندىق ۇلت دەگەن ماسەلە كوتەرىلگەنىن ايتادى.
«بۇل جەردە قازاقستاندىق ەمەس، قازاق ۇلتى دەگەن ماسەلە كوتەرىلىپ وتىر. ءتولقۇجاتتا كىم قالاي جازادى ول، ارينە، اركىمنىڭ ءوز ەركىندە. ەكىنشىدەن، پرەزيدەنت ماڭىزدى ماسەلەنى ايتتى. ءبىزدى بىرىكتىرەتىن نەگىزگى كومپونەنت - ورتاق وتانىمىز، ءبىزدىڭ تۋىمىز، ءبىزدىڭ پاسپورتىمىز. شىن مانىندە قازاقستاننىڭ كوك پاسپورتى تۇراقتىلىقتىڭ سيمۆولىنا كەلەشەككە دەگەن كەپىلدىكتىڭ سيمۆولىنا اينالىپ وتىر. توڭىرەكتەگى گەوساياسي جاعدايدا قازاقستان پاسپورتىن الۋعا دەگەن ۇمتىلىستىڭ ارتىپ وتىرعانىن كورىپ وتىرمىز. پاسپورتى ورتاق، وتانى ورتاق، مادەنيەتى، قۇندىلىعى ورتاق ەتنوستاردىڭ جيىنتىعىن ارينە ۇلت دەپ اتايمىز. بۇل ۇلتتىڭ اتاۋى. قازاقستانداعى ازاماتتار دا وسى ۇلتتىڭ قۇرامداس بولشەگى»، - دەيدى دارحان قىدىرالى.
