بەينەكامەرا ارقىلى كولىك قوزعالىسى ءتارتىبىن باقىلاۋ مۇمكىندىگىن كەڭەيتۋ كەرەك - يگور لەپەحا
بۇل تۋرالى ەلوردادا جولداعى قاۋىپسىزدىك سالاسىندا جاڭا تەحنولوگيالاردى پايدالانۋ تاقىرىبىنداعى فورۋمدا ق ر ىشكى ىستەر ءمينيسترىنىڭ ورىنباسارى يگور لەپەحا ايتتى، دەپ حابارلايدى قازاقپارات ءتىلشىسى.
«جول ەرەجەسىن بۇزۋ دەرەكتەرىن سيفرلىق تەحنولوگيالار ارقىلى انىقتاۋ دەڭگەيىن ءالى دە كوتەرۋ كەرەك. قازىر جولداعى قيىلىستاردى، Bus Lane جولاعىن باقىلاۋ، جىلدامدىق رەجيمى تالاپتارىن ورىنداماعان جۇرگىزۋشىلەردى انىقتاۋ كامەرالار ارقىلى ىسكە اسىرىلىپ جاتىر. دەگەنمەن، ءبىز وسى كامەرالاردىڭ مۇمكىندىگىن كەڭىنەن پايدالانۋدى تالاپ ەتىپ وتىرمىز»، - دەدى يگور لەپەحا جاڭا تەحنولوگيالار سالاسىندا تىڭ جوبالاردى ىسكە اسىرىپ جاتقان ماماندارعا قاراتا ايتقان سوزىندە.
وسى ورايدا ول «سەرگەك» بەينەكامەراسى ارقىلى بولاشاقتا قانداي ەرەجە بۇزۋ دەرەكتەرىن انىقتاۋعا بولاتىنىن ايتتى.
«ەڭ الدىمەن، كامەرالار جاياۋ جۇرگىنشىلەر جولاعىنان اۆتوكولىكتەر وتكەن كەزدە بولاتىن ەرەجە بۇزۋ دەرەكتەرىن انىقتاۋ كەرەك دەپ سانايمىز. ياعني جۇرگىزۋشىلەر جاياۋ كەتىپ بارا جاتقان ادامدارعا جول بەرمەي جاتادى. ەلىمىزدە جاياۋ جۇرگىنشىلەردى قاعىپ كەتۋگە قاتىستى جول-كولىك وقيعالارىنىڭ سانى وتە كوپ. ەگەر ءبىزدىڭ كامەرالار جۇرگىزۋشىلەردىڭ وسى زاڭسىز ارەكەتتەرىن، سونداي-اق جولدا ۇيالى تەلەفون مەن قاۋىپسىزدىك بەلدىگىن پايدالانۋ ەرەجەلەرىن بۇزعانىن تىركەسە، بۇل شەشىمدەر جۇمىسىمىزدى جەڭىلدەتەر ەدى»، - دەدى يگور لەپەحا.
