ۇلكەن جولداردا «ورتاشا جىلدامدىق» جۇيەسى ىسكە قوسىلۋى مۇمكىن
بۇل تۋرالى ەلوردادا جولداعى قاۋىپسىزدىك سالاسىندا جاڭا تەحنولوگيالاردى پايدالانۋ تاقىرىبىنداعى فورۋمدا ق ر ىشكى ىستەر ءمينيسترىنىڭ ورىنباسارى يگور لەپەحا ايتتى، دەپ حابارلايدى قازاقپارات ءتىلشىسى.
«قالا سىرتىنداعى اۆتوموبيل جولدارىنىڭ ۋچاسكەلەرىندە «كولىك قوزعالىستىڭ ورتاشا جىلدامدىعى» سياقتى تۇسىنىك ەنگىزىلمەك. بۇل جۇيەنى قالانىڭ ىشىندە قولدانۋعا بولمايدى، ءبىراق اۆتوماگيسترالدىڭ ۋچاسكەلەرىندە بۇل ماسەلەنى شەشۋگە بولادى دەپ ويلايمىن. ونىڭ ۇستىنە، ەلىمىزدە اقىلى جولداردىڭ ەنگىزىلگەنىن ەسكەرسەك، قازىردىڭ وزىندە جولدىڭ بويىندا كوپتەگەن كامەرا بار. ەگەر ولار ءبىر جۇيەگە قوسىلسا، سونداي-اق زاڭنامادا ءتيىستى نورما بولسا، وندا جولدا جىلدامدىقتى شامادان تىس اسىرۋ سياقتى ەرەجە بۇزۋ دەرەكتەرىن انىقتاۋعا بولادى»، - دەدى يگور لەپەحا.
بۇعان دەيىن حابارلانعانداي، اكىمشىلىك پوليتسيا كوميتەتى ءتوراعاسىنىڭ ورىنباسارى جاندوس مۇراتاليەۆ ەلىمىزدە ەنگىزىلگەلى وتىرعان «ورتاشا جىلدامدىق» جۇيەسىنىڭ قالاي جۇمىس ىستەيتىنىن ءتۇسىندىردى.
ەگەر بۇل جوبا ەنگىزىلەتىن بولسا، ول تەك ۇلكەن تاس جولداردا قولدانىلادى، قالا ىشىندە قولدانىلمايدى. «ورتاشا جىلدامدىق» جۇيەسى بەينەكامەرالار ارقىلى كولىكتىڭ ا نۇكتەسىنەن ب نۇكتەسىنە دەيىن قانشا ۋاقىتتا جەتكەنىن انىقتايدى. كەيىن اۆتوكولىكتىڭ وسى ارالىقتا قانداي جىلدامدىقپەن جۇرگەنىن اۆتوماتتى تۇردە ەسەپتەپ، ورتاشا جىلدامدىعىن شىعارادى. ەگەر ەسەپتەۋ بارىسىندا جىلدامدىعى جوعارى بولعانى انىقتالسا، وندا اكىمشىلىك جاۋاپكەرشىلىككە تارتىلادى.
