ەلىمىزدە جاز كەزىندە جول-كولىك وقيعالارىنىڭ سانى ءوسۋى مۇمكىن

بۇل تۋرالى ەلوردادا جولداعى قاۋىپسىزدىك سالاسىندا جاڭا تەحنولوگيالاردى پايدالانۋ تاقىرىبىنداعى فورۋمدا ق ر ىشكى ىستەر ءمينيسترىنىڭ ورىنباسارى يگور لەپەحا ايتتى، دەپ حابارلايدى قازاقپارات ءتىلشىسى.

«جىل سايىن حالىقارالىق ترانزيت اعىنى دا ءوسىپ كەلەدى. جاز كەزىندە ەلىمىزگە وزدەرىنىڭ كولىگىمەن ساپارلاپ كەلەتىن شەتەل ازاماتتارى كوبەيەدى. ەلىمىزدىڭ ازاماتتارى دا باسقا وڭىرلەرگە كۋرورتقا بارادى. بۇل تۇرعىدا جولداعى اپات كۇرت ءوسۋى مۇمكىن. جولداعى اپات سانىن تەك پوليتسيا كۇشىمەن ازايتۋ مۇمكىن ەمەس»، - دەدى يگور لەپەحا.

وسى ورايدا ول ەلىمىزدىڭ اۋقىمدى اۋماعىن ەسكەرە وتىرىپ، پوليتسەيلەر پاترۋلىن ءار جولدىڭ بويىندا ءجيى قويۋ مۇمكىن ەمەس ەكەنىن ايتتى.

«سونىمەن قاتار، قازىر پوليتسەيلەردىڭ ءبىراز فۋنكتسيالارى قىسقارعان. بۇل تۇرعىدا پوليتسيا قىزمەتكەرلەرىنە كولىكتى سەبەپسىز توقتاتۋعا تىيىم سالعانبىز. جول ەرەجەسىن بۇزعان جاعدايدا عانا توقتاتادى. سوندىقتان جولداعى كولىك قوزعالىسىن قاداعالاۋدىڭ بارلىق پروتسەسىن سيفرلاندىرۋ اياسىندا ءتيىستى وڭتايلى شەشىمدەر بولۋى كەرەك. اتاپ ايتقاندا، وسىعان دەيىن بۇل سالادا ءبىراز وڭ قادامدار جاسالدى. قازىرگى كەزدە وبلىس ورتالىقتارىندا جولداعى ەرەجە بۇزۋ دەرەكتەرىنىڭ جارتىسىنان كوبى اۆتوماتتى تىركەۋ قۇرالدارى ارقىلى انىقتالىپ جاتىر»، - دەدى يگور لەپەحا.

بۇدان بۇرىن حابارلانعانداي، كەيىنگى 12-15 جىلدا اۆتوكولىك سانى 3 ميلليوننان 5 ميلليونعا دەيىن ارتتى.

سونىمەن قاتار، ي. لەپەحا ەلەكتر ساموكاتتىڭ جىلدامدىعى ساياباق اۋماعىندا اۆتوماتتى تۇردە باسەڭدەۋى كەرەك ەكەنىن ايتتى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى