الماتى زووباعى الپاكانىڭ ءجۇنىن قىرقاتىن گرۋمەر ىزدەپ جاتىر
الماتى زووباعىنىڭ مالىمەتىنشە، جانۋارلاردىڭ ءجۇنى ءتۇسىپ، ءتۇر- تۇستەرى كۇتىمسىز بولىپ كورىنۋى قالىپتى تابيعي جاعداي. باقتاعى قاسقىر، تۇلكى، ايۋ، بۇعى مەن تۇيەلەر - بارلىعى دا وسى كەزدە تۇلەيدى. لەوپاردتار مەن پونيلار جانە پرجيەۆالسك جىلقىلارىنىڭ جۇندەرى جۇقا بولعاندىقتان ولاردىڭ تەرىسىنىڭ تۇلەگەنى اسا بىلىنبەيدى. ماۋسىم ايىنىڭ ورتاسىندا ولاردىڭ تۇلەۋى توقتايدى.
«زووباعىمىزعا كەلۋشىلەردىڭ كوبى جانۋارلاردىڭ كۇتىمى جوق، جۇندەرى ءتۇسىپ، قاراۋسىز ءجۇر دەپ ويلايدى. شىندىعىندا جانۋارلارىمىزدىڭ دەنساۋلىعى دا، كۇتىمى دە جاقسى. ولاردىڭ ءجۇنى ءتۇسىپ، ءتۇر- تۇستەرى كۇتىمسىز بولىپ كورىنۋى - قالىپتى تابيعي جاعداي. جانۋارلار كوكتەمدە تۇلەيدى»، - دەپ اتاپ ءوتتى زووباق اكىمشىلىگى.
قازىر زووباق تۇيەتۇقىمداس جانۋار - شوكولادكا ەسىمدى الپاكانىڭ ءجۇنىن قىرقاتىن گرۋمەر ىزدەپ جاتىر.
«زووباق قىزمەتكەرلەرىنىڭ اراسىندا ارنايى گرۋمەر (جانۋاردىڭ تەرى، ءجۇنىن قالىپقا كەلتىرەتىن مامان) جوق. سوندىقتان الپاكاعا شاشتاراز ىزدەيمىز. ارالارىڭىزدا «جانۋارلاردىڭ شاشتارازى» بولىپ، وسى جۇمىستى قورىقپاي اتقارا الاتىندارىڭىز بار ما؟ بالكىم ءبىزدىڭ الپاكانىڭ ءجۇنىن وزگەشە، زاماناۋي تۇردە ەرەكشە رەتكە كەلتىرىپ بەرە الاسىز؟ الپاكاعا گرۋمەر بولىپ بەرەتىندەردى زووباقتا كۇتەمىز»، - دەلىنگەن زووباقتىڭ Instagram-داعى حابارلاماسىندا.
ايتا كەتەيىك، الماتى زووباعىنا لاماتۇقىمداس ەرەكشە جانۋار بىلتىر رەسەيدىڭ كراسنودارسك حايۋاناتتار باعىنان جەتكىزىلگەن.
Посмотреть эту публикацию в Instagram
