التاي كولگىنوۆ جۇمىس بەرۋشىنىڭ ەڭبەك قاۋىپسىزدىگى بويىنشا جاۋاپكەرشىلىگىن كۇشەيتۋدى تاپسىردى

ەلوردادا ءوتىپ جاتقان «KIOSH-2023» حالىقارالىق كونفەرەنسياسىنا بايانداما جاساعان پرەمەر-ءمينيستردىڭ ورىنباسارى التاي كولگىنوۆ وسىلاي ءمالىم ەتتى، دەپ حابارلايدى قازاقپارات ءتىلشىسى.

«جۇمىس بەرۋشىنىڭ ەڭبەك قاۋىپسىزدىگى بويىنشا جاۋاپكەرشىلىگىن كۇشەيتۋ كەرەك. سونىمەن بىرگە ەڭبەك سالاسىنا مەملەكەتتىك جانە قوعامدىق باقىلاۋدى قاتاڭداتۋ ماڭىزدى. بۇل رەتتە قوعامدىق قاداعالۋعا كوپ كوڭىل ءبولىنۋى ءتيىس. بۇل جۇمىس بەرۋشى مەن قىزمەتكەر اراسىنداعى ديالوگتى دامىتا تۇسەدى. سوندىقتان بىزگە بۇگىندە 245 كاسىپورىندا قولدانىلاتىن «حالىق باقىلاۋى» باعدارلاماسىن كەڭەيتۋ قاجەت. بۇعان قوسا، 420 كاسىپورىنعا ەنگىزىلگەن «نولدىك جاراقاتتانۋ» تۇجىرىمداماسىن ودان ءارى جەتىلدىرۋ ورىندى بولماق»، - دەپ ەڭبەك جانە حالىقتى الەۋمەتتىك قورعاۋ مينيسترلىگىنىڭ وكىلدەرىنە تاپسىرما جۇكتەدى التاي كولگىنوۆ.

ول وڭىرلەردەگى جازاتايىم وقيعالاردى تەرگەۋمەن اينالىساتىن كوميسسيانىڭ جۇمىس فورماتىن وزگەرتۋدى ۇسىندى. ۆيتسە-پرەمەردىڭ سوزىنشە، ولار ماسەلەنىڭ سالدارىمەن ەمەس، سەبەبىمەن كۇرەسىپ، قىزمەت باعىتىن الدىن الۋ شارالارىنا باعىتتاۋى ءتيىس.

التاي كولگىنوۆتىڭ مالىمدەۋىنشە، جىل سايىن ەلىمىزدەگى كاسىپورىنداردا 2 مىڭ ادام ونەركاسىپتىك جاراقات الىپ، سالدارىنان شامامەن 200 جۇمىسكەر كوز جۇمادى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى