سيدنەيدە الاپات ورتتەن عيماراتتىڭ قابىرعاسى وپىرىلىپ ءتۇستى

ءورت بۇگىن جەرگىلىكتى ۋاقىتپەن ساعات 16:00 دەن كەيىن رەندل-ستريتتەگى تاريحي مۇرالار تىزىمىنە ەنگەن عيماراتتا بولعان. ءتىلسىز جاۋدىڭ كەسىرىنەن كوشەدەگى قوزعالىس توقتاپ، عيمارات قابىرعالارى قۇلادى.

جاڭا وڭتۇستىك ۋەلستىڭ ءورت ءسوندىرۋ-قۇتقارۋ قىزمەتىنىڭ 100 دەن استام قىزمەتكەرى سارري- حيللز اۋدانىنداعى ءورتتى سوندىرۋگە جىبەرىلگەن.

ءورت سالدارىنان كوپقاباتتى ءۇيدىڭ قابىرعالارى دا وپىرىلىپ تۇسكەن. ءورت سوندىرۋشىلەر جالىن كورشىلەس عيماراتتارعا دا تاراي ما دەپ قاۋىپتەنىپ وتىر.

كۋاگەرلەردىڭ ءبىرى الدىمەن عيماراتتان ءتۇتىن شىعىپ جاتقانىن كورگەنىن ايتادى. سودان كەيىن ورتكە ورانىپ، قابىرعاسى قۇلاعان. «اينالا ۋ-شۋ بولىپ جاتتى. جەر قوزعالدى»، - دەيدى ول.

تاعى ءبىر كۋاگەردىڭ ايتۋىنشا، جالىننىڭ ىستىعى بەت شىجعىراتىنداي بولعان. جاقىن ماڭداعى شيناسى جارىلعان كولىكتەردىڭ داۋىسى ەستىلگەن.

«ءورتتىڭ اۋماعى مىنا اۋرۋحانامەن بىردەي بولدى»، - دەدى كۋاگەر ايەل كورشى عيماراتتى كورسەتىپ. ايتۋىنشا، ون مينۋتتان كەيىن عيماراتتىڭ قابىرعاسى وپىرىلىپ تۇسكەن.

ءبىر ءورت ءسوندىرۋشىنىڭ قولىن ازداپ كۇيىك شالعان. بۇدان وزگە ورتتەن زارداپ شەككەندەر مەن كوز جۇمعانداردىڭ بار-جوعى ازىرگە بەلگىسىز بولىپ وتىر.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى