دەپۋتات كامەلەتكە تولماعاندار اراسىنداعى قىلمىستىڭ ءوسۋ سەبەپتەرىن ايتتى
وسى ورايدا سەناتور قايرات تاستەكەيەۆ ۇكىمەت باسشىسىنىڭ ورىنباسارى التاي كولگىنوۆتىڭ اتىنا جولداعان دەپۋتاتتىق ساۋالىندا اتالعان ماسەلەگە توقتالدى.
دەپۋتاتتىڭ ايتۋىنشا، جاستاردىڭ قۇقىقتىق ساناسى مەن قۇقىقتىق مادەنيەتىن قالىپتاستىرۋ مەملەكەتتىك ساياساتتىڭ باسىم مىندەتتەرىنىڭ ءبىرى. بۇل رەتتە ءبىلىم بەرۋ ماڭىزدى ءرول اتقارادى.
سەناتوردىڭ پايىمىنشا، جاپپاي قۇقىقتىق تاربيەنىڭ جەتكىلىكتى بولماۋى جاستار اراسىنداعى قىلمىسپەن ءتيىستى دەڭگەيدە كۇرەسۋگە مۇمكىندىك بەرمەي وتىر.
«جاستار قوعامنىڭ بەلسەندى بولىگى ەكەنىن ەسكەرە وتىرىپ، ولاردىڭ ساۋاتىن كوتەرۋ جانە زاڭعا باعىتتالعان مىنەز-قۇلىق ۇلگىسىن تاربيەلەۋ جونىندەگى جۇمىستى كۇشەيتۋ قاجەت. جاس وسپىرىمدەر اراسىندا زاڭعا دەگەن وڭ كوزقاراستى قالىپتاستىرۋ، سونداي-اق ءبىلىم بەرۋدىڭ بارلىق دەڭگەيىندە ارنايى وقۋ جوسپارلارى مەن كۋرستارى ارقىلى قۇقىق جۇيەسىنىڭ ەرەكشەلىگىمەن تانىستىرۋ ماڭىزدى. قۇقىقتىق ءبىلىم بەرۋ پروتسەسىندە وقۋشى قوعامدا وتە ماڭىزدى قۇندىلىقتاردى مەڭگەرەتىنى ءمالىم. سوندىقتان وقۋ ورىندارىندا ارنايى ءبىلىم بەرۋمەن قاتار، قۇقىقتىق ساۋاتتىلىقتى دا كوتەرۋ وتە ماڭىزدى»، - دەدى قايرات تاستەكەيەۆ.
بۇدان بۇرىن حابارلانعانداي، ەلىمىزدەگى بالا قۇقىقتارى جونىندەگى ۋاكىل ارۋجان ساين Artsport باعدارلاماسى ىسكە قوسىلعان كەزدە جاس وسپىرىمدەر مەن بالالار قىلمىسى تومەندەي باستاعانىن ايتتى.
ونىڭ سوزىنە قاراعاندا، بۇل باعدارلاما اياسىنداعى جۇمىستار ءبىرشاما تەجەلىپ، قارجىلاندىرۋ سالاسىنداعى ماسەلەلەر بولعان كەزدە، بالالار اراسىندا قىلمىستار سانى قايتادان وسكەن.
