بالالاردىڭ جازعى لاگەرىنە قانداي تالاپتار قويىلادى
دەنساۋلىق ساقتاۋ مينيسترلىگى كانيكۋل كەزەڭىندە بالالاردىڭ ساۋىقتىرۋ دەمالىسىن، بوس ۋاقىتىن جانە جۇمىسپەن قامتىلۋىن ۇيىمداستىرۋدا مەديتسينالىق قىزمەت كورسەتۋ بويىنشا جەرگىلىكتى اتقارۋشى ورگانداردى ۇيلەستىرۋدى، ساۋىقتىرۋ مەكەمەلەرىندە بالالاردىڭ جاعدايىنىڭ قاۋىپسىزدىگىنە سانيتاريالىق-ەپيدەميولوگيالىق باقىلاۋدى ۇيىمداستىرادى.
«اكىمدىكتەردىڭ مالىمەتىنشە، بيىل جازعى ماۋسىمدا 12 مىڭعا جۋىق لاگەر، ونىڭ ىشىندە 11 مىڭنان استام مەكتەپ جانىنداعى لاگەر، 236 عا جۋىق قالا سىرتىنداعى ساۋىقتىرۋ لاگەرىن اشۋ جوسپارلانۋدا، وندا 1 ميلليون 600 مىڭنان استام بالا دەمالادى. مەديتسينالىق-سانيتاريالىق العاشقى كومەك دەڭگەيىندە بالالاردى مەديتسينالىق تەكسەرۋ، ونىڭ ىشىندە يممۋندىق ستاتۋسى، دەنساۋلىق جاعدايى تۋرالى انىقتامالار بەرۋ، ينفەكتسيالىق ناۋقاستارمەن بايلانىسى جوقتىعىن تەكسەرۋ ۇيىمداستىرىلادى»، - دەدى مينيستر ۇكىمەت وتىرىسىندا.
ونىڭ ايتۋىنشا، قالا ماڭىنداعى لاگەرلەردە 400 گە جۋىق مەديتسينا قىزمەتكەرى مەديتسينالىق كومەك كورسەتەدى.
سونداي-اق، ساۋىقتىرۋ مەكەمەلەرىنە قويىلاتىن نەگىزگى تالاپتار دا بار.
«بالالار كەلگەنشە بارلىق قالا سىرتىنداعى لاگەرلەر سانيتاريالىق-ەپيدەميولوگيالىق تالاپتارعا سايكەستىگىن راستايتىن سانيتاريالىق-ەپيدەميولوگيالىق قورىتىندى الۋعا مىندەتتى. تاماق دايىنداۋ جانە تاماقتانۋ شارتتارى مەن قاۋىپسىزدىگى، سۋ قويمالارى مەن باسسەيندەردى قوسا العاندا، تۇرۋ جانە دەمالۋ جاعدايلارى، اۋىز سۋ قاۋىپسىزدىگى تەكسەرىلەدى. اۋماق پەن ءۇي-جايلار كەمىرگىشتەرگە، جاندىكتەرگە، كەنەلەرگە جانە قان سورعىشتارعا قارسى تازارتىلۋى كەرەك»، - دەپ ءتۇسىندىردى ا. عينيات.
سانيتاريالىق-ەپيدەميولوگيالىق قورىتىندى بولماعان كەزدە بالالاردى قالا سىرتىنداعى لاگەرلەرگە قابىلداۋعا جول بەرىلمەيدى.
«جازعى لاگەردى تاڭداۋ كەزىندە اتا-انانىڭ ارەكەتتەرى اسا ماڭىزدى. اتا-انالارعا مينيسترلىك سايتىندا، سونداي-اق سانيتاريالىق-ەپيدەميولوگيالىق باقىلاۋ كوميتەتىنىڭ جانە ونىڭ اۋماقتىق دەپارتامەنتتەرىنىڭ سايتتارىندا قورىتىندى العان قالا سىرتىنداعى لاگەرلەر تۋرالى اقپاراتتى پايدالانۋدى ۇسىنامىز. سۇراقتار تۋىنداعان جاعدايدا جەدەل جەلى تەلەفونىنا حابارلاسۋعا بولادى»، - دەدى دەنساۋلىق ساقتاۋ ءمينيسترى.
