جۇمىسقا تۇرعىڭىز كەلسە، مىنا سوزدەردى ايتپاڭىز
الايدا قانداي جۇمىس بولماسىن قىزمەتكەردى جۇمىسقا الماس بۇرىن ونىمەن مىندەتتى تۇردە سۇحباتتاسادى. ەندەشە، سۇحباتتاسۋ كەزىندە قانداي سوزدەردى ايتپاعان ءجون؟
«مەن بايقاپ كورەيىن»
بۇل ءسوز بولاشاق قىزمەتكەردىڭ سەنىمسىزدىگىن كورسەتەدى. شىندىعىندا، ءسىزدىڭ بايقاپ كورگەنىڭىزدى ەشكىم قالامايدى، جۇمىس بەرۋشىگە ءسىزدىڭ جۇمىستى جاساعانىڭىز كەرەك.
ادام «مەن بايقاپ كورەيىن» دەسە، ول ءوزىنىڭ ۋايىمداپ تۇرعانىن جانە قانداي ناتيجە بەرەتىنىنە سەنىمسىز ەكەنىن كورسەتىپ قويادى. ەگەر ادام ءوز- وزىنە سەنبەسە، ونىڭ جەتىستىككە جەتۋ مۇمكىندىگى تومەن. ال بۇل باسشىلىق ءۇشىن دە جاقسى كورسەتكىش ەمەس.
سۇحباتتاسۋ كەزىندە بارلىق ادام ۋايىمداپ وتىرادى، ءبىراق تىنىشتالۋعا تىرىسىڭىز. ءسىزدىڭ بارلىق تاپسىرمالاردى بىردەن ورىنداپ شىعاتىنىڭىزعا ەشكىم كەپىل بەرە المايدى. جۇمىسقا جاڭادان تۇرعان كەزدە پروتسەسكە ەنىپ كەتۋىڭىزگە ءبىراز ۋاقىت كەرەك. ونى جۇمىس بەرۋشى دە جاقسى تۇسىنەدى. سوندىقتان ول جاعىن قاتتى ۋايىمداماڭىز.
«مەندە تۇيىندەمە/پورتفوليو جوق»
كەز كەلگەن جۇمىس سىزدەن تۇيىندەمە سۇرايدى. كەي جۇمىس ورىندارى پورتفوليو سۇراۋى مۇمكىن. سۇحباتتاسۋعا بارعان كەزدە «قازىر قولىمدا تۇيىندەمەم جوق ەدى»، «پورتفوليوم ءالى دايىن بولمادى» دەسەڭىز، جۇمىس بەرۋشىنىڭ كوڭىلىن قالدىراسىز. ولاردىڭ قاراپايىم تالابىن ورىنداماعاننان كەيىن ءسىزدى ارى قاراي جۇمىسقا الۋدىڭ قاجەتى بولماي قالادى. ەگەر جۇمىسقا ورنالاسقىڭىز كەلسە، سىزدە ەڭ الدىمەن تۇيىندەمە مەن پورتفوليو دايىن بولۋى كەرەك.
«بۇل جايلى تۇيىندەمەدە جازدىم عوي»
ءسىز جۇمىس بەرۋشىنىڭ تۇيىندەمەڭىزدى وقىماعانىنا رەنجۋىڭىز مۇمكىن. ءبىراق ەموتسياعا بەرىلۋدىڭ قاجەتى جوق. بىرىنشىدەن، ول ەگجەي-تەگجەيلى بىلگىسى كەلگەندىكتەن، سىزگە ول سۇراقتى قايتا قويعان بولۋى مۇمكىن. ەكىنشىدەن، ولار ءسىزدىڭ جۇرت الدىندا قالاي سويلەيتىنىڭىزدى كورگىسى كەلگەن بولۋى مۇمكىن. سوندىقتان مۇنداي جاعدايدا سۇراققا جاۋاپ بەرىڭىز، ءوزىڭىز جانە ناتيجەلەرىڭىز جايلى ايتىڭىز.
«بۇرىنعى باسشىلىق ماعان مۇلدەم ۇنامايتىن»
كەز كەلگەن جۇمىس بەرۋشى بۇرىنعى جۇمىستان نە ءۇشىن كەتكەنىڭىزدى جانە بۇرىنعى ارىپتەستەرىڭىزبەن قارىم- قاتىناسىڭىز قانداي بولعانىن بىلگىسى كەلەدى. ءبىراق بۇل سۇراققا جاۋاپ بەرگەندە اباي بولىڭىز. «بۇرىنعى باسشىلىق، جۇمىس، ارىپتەستەر ۇنامادى» دەپ جامانداعانشا، ول جاقتان قانداي تاجىريبە العانىڭىزدى ايتىڭىز.
«جالاقىنى قاشان كوتەرەدى؟»
جۇمىسقا تۇراردا جالاقىنى سۇراۋدا تۇرعان ەشتەڭە جوق. الايدا بۇل ءسىزدىڭ ءبىرىنشى سۇراعىڭىز بولماۋى ءتيىس. سىزگە الدىمەن جۇمىستىڭ ءوزى قىزىق بولۋى كەرەك: ول قانداي كومپانيا، بۇل كومپانيا قانداي جوبالارمەن جۇمىس ىستەيدى، قانداي تاپسىرمالار بەرىلەدى جانە ت. ب. وسى سۇراقتاردىڭ جاۋابىن العان سوڭ بۇل جۇمىس ءۇشىن قانشا جالاقى بەرىلەتىنىن سۇراڭىز. سونداي-اق سۇحباتتاسۋ كەزىندە جالاقىنى قاشان كوتەرەتىنىن سۇراماعان ءجون. الدىمەن ناقتى جۇمىس كولەمىن ورىنداپ، جوبانى تاپسىرىڭىز. كەيىن جالاقىنى ءوسىرۋ جايلى سويلەسەسىز. ءبىراق سۇحباتتاسۋ كەزىندە جالپى مانساپ بويىنشا ءوسىم بولا ما ەكەنىن بىلۋگە بولادى.
جۇمىس بەرۋشى جوباسىن سەنىپ تاپسىرۋعا بولاتىن جارقىن، سەنىمدى جانە ماقساتتى قىزمەتكەردى كورگىسى كەلەتىنىن ۇمىتپاڭىز.
