شىعىس قازاقستان تۇرعىنى جارتى عاسىردان استام ۋاقىت جەكە كۋالىكسىز جۇرگەن
ش ق و پوليتسيا دەپارتامەنتى باسپا ءسوز قىزمەتىنىڭ مالىمەتىنە سۇيەنسەك، 52 جاستاعى ەر ادام وسى ۋاقىتقا دەيىن جەكە باسىن كۋالاندىراتىن قۇجاتسىز جۇرگەن. وعان بۇل قۇجاتتى راسىمدەۋگە وسكەمەن قالالىق پوليتسيا باسقارماسى كوشى- قون قىزمەتىنىڭ ماماندارى كومەكتەستى.
«شىعىسقازاقستاندىق 1970 -جىلى وسكەمەن قالاسىندا تۋعان. ونىڭ اتا-اناسى قازاقستان رەسپۋبليكاسىنىڭ ازاماتتارى بولعان. الايدا ومىرلىك قيىن جاعدايلار وعان ەڭ ماڭىزدى قۇجاتتى الۋعا مۇمكىندىك بەرمەگەن. كوشى-قون قىزمەتى ەر ادامنىڭ قازاقستان ازاماتتىعىنا جاتاتىندىعىن راستاۋ ءۇشىن قاجەتتى قۇجاتتاردى جيناۋعا كومەك كورسەتتى»، - دەلىنگەن اقپاراتتا.
ەندى وعان ماڭىزدى قىزمەتتەردى، ونىڭ ىشىندە الەۋمەتتىك جانە مەديتسينالىق قىزمەتتەردى الۋ راسىمدەرى جەڭىلدەيدى.
ايتا كەتەيىك، 2023 -جىلدىڭ باسىنان وبلىس بويىنشا 30-دان استام ادام ءوز مارتەبەسىن انىقتاپ، قازاقستان رەسپۋبليكاسى ازاماتىنىڭ جەكە كۋالىگىن العان.
