وتاندىق قۇرىلىس ماتەريالدارىن شىعاراتىندار قوماقتى شىعىنعا باتۋى مۇمكىن - باقتىقوجا ىزمۇحامبەتوۆ
ونىڭ ايتۋىنشا، «AMANAT» پارتياسىنىڭ 2023-2027-جىلدارعا ارنالعان سايلاۋالدى باعدارلاماسىنىڭ الدىنداعى ون مىندەتتىڭ ءبىرى - قالا مەن اۋىلداردا ادامداردىڭ ءومىرى ءۇشىن قولايلى جاعداي جاساۋ، تۇرعىن ۇيمەن جانە ساپالى ينفراقۇرىلىممەن قامتاماسىز ەتۋ. بولاشاقتا 730 مىڭنان استام وتباسى ءۇشىن قولايلى باعاداعى 78 ميلليون شارشى مەتردەن استام جاڭا تۇرعىن ءۇي سالۋ جوسپارى بار.
«پارتيا باعدارلاماسىنا وراي جەكە قۇرىلىس كومپانيالارىن الەۋمەتتىك تۇرعىن ءۇي سالۋعا ىنتالاندىرۋ جولدارى قاراستىرىلماق. جاڭادان «قۇرىلىس» كودەكسى جانە «ريەلتورلىق قىزمەت تۋرالى» زاڭدار قابىلداناتىن بولادى. مەنىڭ ساۋالىم قۇرىلىس سالاسىنداعى وتاندىق تاۋار ءوندىرۋشى كاسىپكەرلەردى قولداۋعا قاتىستى. تۇرعىن ءۇي سالۋ جانە جوندەۋ جۇمىستارىنا تەندەرلەر سول جوباداعى قۇرىلىستى تولىق تاپسىرۋعا ارنالىپ جاريالانادى. بۇل تۇرعىدا قۇرىلىس جوباسىن جەڭىپ العان مەردىگەردىڭ كونكۋرستىق ۇسىنىسىندا قۇرىلىس ماتەريالدارىنىڭ (جابىن پليتاسى، كىرپىش، تسەمەنت، ءتۇرلى قۇبىرلار، ەسىك، تەرەزەلەر، تاعى باسقالارى) قاي بولىگى ەلىمىزدە وندىرەلەتىنى، قاي ماتەريالدار سىرتتان الاتىنى، سونداي-اق ماتەريالدىڭ قۇنىن قالاي، قاشان وتەيتىنى مەردىگەردىڭ تەندەرگە ۇسىنىسىندا كورسەتىلىپ، تەندەر شەشىمىندە ەسكەرىلسە دۇرىس بولار ەدى. ويتكەنى كوپ جاعدايدا قۇرىلىسقا قاجەت تاۋاردى ءوندىرۋشى كومپانيا تيەسىلى قارجىسىن الۋ ءۇشىن مەردىگەردىڭ قۇرىلىس جوباسىن تولىق ءبىتىرۋىن كۇتۋگە ءماجبۇر. بۇل كەيدە جىلدارعا سوزىلۋى مۇمكىن. ناتيجەسىندە، قۇرىلىس ماتەريالىن شىعاراتىن كومپانيا بانك الدىنداعى بەرەشەگىن وتەگەنشە ۇزاق ءارى قوسىمشا شىعىنعا باتادى»، - دەدى ب. ىزمۇحامبەتوۆ پرەمەر-مينيستر ءاليحان سمايىلوۆتىڭ اتىنا جولداعان ساۋالىندا.
ونىڭ ايتۋىنشا، مۇنداي جاعداي وتاندىق قۇرىلىس ماتەريالدارىن شىعاراتىن كومپانيالارعا ۇلكەن قاۋىپ ءتوندىرىپ، نارىقتان ىعىستىرۋى مۇمكىن.
«قازاقستان رەسپۋبليكاسىنداعى مەملەكەتتىك ساتىپ الۋ زاڭىنىڭ شارتتارىنا وزگەرىستەر مەن تولىقتىرۋلار ەنگىزىلگەن كەزدە جانە جاڭادان قابىلداناتىن «قۇرىلىس» كودەكسىندە وسى ماسەلە ەسكەرىلۋى كەرەك دەپ سانايمىز»، - دەدى دەپۋتات.
