قازاقستاندىق تەننيسشىنىڭ تابىسى قانشا ميلليون دوللارعا جەتكەنى بەلگىلى بولدى

باي-قۋاتتىلاردىڭ رەيتينگىندە ەلىمىزدىڭ ءبىرىنشى جانە الەمنىڭ ءتورتىنشى راكەتكاسى ەلەنا رىباكينا كوش باستاپ تۇر.

ارينە، وعان ەش تاڭدانۋعا بولمايدى. بيىلدىڭ وزىندە عانا ەلەنا ينديان-ۋەللس، ريمدەگى تۋرنيرلەردە باس جۇلدەنى ولجالاسا، اۋستراليانىڭ اشىق بىرىنشىلىگى مەن ماياميدەگى دودادا فينالعا دەيىن جەتتى. ونىڭ سىرتىندا، بىلتىر ۋيمبلدوندا جەڭىمپاز اتانىپ، WTA مەن ITF جارىستارىن قوسا العاندا توعىز مارتە توپ جارعانى تاعى بار. وسىلايشا، كەلەسى ايدا 24 جاسقا تولعالى وتىرعان ەلەنا رىباكينا 10155965 ا ق ش دوللارى كولەمىندە سىياقى الدى.

ەكىنشى ورىندا - ميحايل كۋكۋشكين. 35 جاستاعى جەرلەسىمىزدىڭ ەڭ جاقسى كورسەتكىشى - اۋستراليانىڭ اشىق بىرىنشىلىگى (2012-جىلى) مەن ۋيمبلدوننىڭ (2019) ءتورتىنشى كەزەڭىنە دەيىن جەتۋى. 2010-جىلى ول رەسەيدىڭ سانكت-پەتەربۋرگ قالاسىندا وتكەن اتر تۋرنيرىندە الدىنا جان سالمادى. كۋكۋشكيننىڭ تابىسى - 6815090 دوللار.

ۇزدىك ۇشتىكتى ياروسلاۆا شۆەدوۆا تۇيىندەپ تۇر. 35 جاستاعى بۇرىنعى ويىنشى قازىر سپورتتىق كارەراسىن اياقتاپ، جاتتىقتىرۋشىلىق قىزمەت اتقارىپ ءجۇر. كەزىندە ول رولان گارروس (2010، 2012) پەن ۋيمبلدوننىڭ (2016) شيرەك فينالىندا ونەر كورسەتتى. ا ق ش- تىڭ اشىق بىرىنشىلىگىنىڭ (2016) ءتورتىنشى اينالىمىنا جولداما الدى. اسىرەسە شۆەدوۆا جۇپتىق سايىستاردا ءوزىن جاقسى قىرىنان كورسەتە ءبىلدى. جارىستىڭ ءدال وسى تۇرىندە وتانداسىمىز ا ق ش- تىڭ اشىق بىرىنشىلىگى (2010) مەن ۋيمبلدوندا (2010) قارسىلاس شاق كەلتىرمەدى. رولان گارروستىڭ (2015) اقتىق سىنىنا دەيىن القىنباي جەتتى. جۇپتاسىپ ويناۋدا WTA تۋرنيرلەرىندە 13 رەت دارا شىقسا، تاعى ءبىر رەت جەكەلەگەن سايىستا باعى جاندى. وسى تابىستارىنىڭ ارقاسىندا ياروسلاۆانىڭ ەسەپشوتىنا 6717223 دوللار اۋدارىلدى.

سونداي-اق توپ-10-تىڭ قاتارىندا يۋليا پۋتينتسيەۆا (6442126 ا ق ش دوللارى)، الەكساندر بۋبليك (4618096)، زارينا دياس (3682468)، اندرەي گولۋبيەۆ (229737)، گالينا ۆوسكوبويەۆا (2525167)، الەكساندر نەدوۆەسوۆ (1253165)، اننا دانيلينا (660132) بار.

egemen.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى