يپوتەكا الاتىندار ازايىپ، كەپىلسىز نەسيەگە سۇرانىس ارتتى
بانكتەرگە ءبىرىنشى توقساندا 127,5 مىڭ ءوتىنىم ءتۇستى
قازاقستاندا ءبىرىنشى توقساندا يپوتەكالىق جانە كەپىلدىك نەسيەلەرگە سۇرانىس تومەندەگەن. ال كەپىلسىز قارىزدارعا دەگەن سۇرانىس %8 عا، اۆتونەسيەگە %7 عا ءوستى.
ەلىمىزدە ءبىرىنشى توقساندا يپوتەكالىق نەسيەگە سۇرانىس %13 عا تومەندەگەنى بايقالعان. بۇل 194 مىڭ ءوتىنىم ازايعانىن بىلدىرەدى. الماتى مەن استانادا سۇرانىس بىردەن %20 عا تومەندەگەن.
ۇلتتىق بانك نەگىزىنەن ءىرى بانكتەردەگى كورسەتكىش تومەندەگەنىن حابارلادى. ال نارىق قاتىسۋشىلارى مۇنى «7-20-25» مەملەكەتتىك باعدارلاماسى شەڭبەرىندە اي سايىنعى ليميتتەردىڭ تەز يگەرىلۋىمەن، ماۋسىمعا وراي سۇرانىستىڭ ازايۋىمەن جانە نەسيە بويىنشا مولشەرلەمەنىڭ تومەندەۋىمەن تۇسىندىرەدى.
«يپوتەكالىق قارىزدار قۇنىنىڭ ءوسۋى كەيبىر بانكتەردەگى باعدارلامالار بويىنشا يپوتەكالىق نەسيەلەۋدىڭ ازايۋىنا اسەر ەتتى»، - دەپ اتاپ ءوتتى ۇلتتىق بانكتىڭ قارجىلىق تۇراقتىلىق جانە زەرتتەۋلەر دەپارتامەنتىنىڭ ديرەكتورى ولجاس كۇبەنبايەۆ.
يپوتەكاعا ءوتىنىم بەرۋدىڭ ورتاشا سوماسى توقسان ىشىندە %4 عا نەمەسە 700 مىڭ تەڭگەگە ءوسىپ، 17,2 ميلليون تەڭگە بولعان. وتكەن جىلدىڭ سايكەس كەزەڭىمەن سالىستىرعاندا، ورتاشا چەك 1,6 ميلليون تەڭگەگە وسكەن.
ءبىرىنشى توقساندا بانكتەر بارلىعى 127,5 مىڭ ءوتىنىمدى قارادى، ماقۇلداۋ دەڭگەيى (قارالماعان وتىنىمدەردى ەسەپكە الماعاندا) %33,5 دان %38 عا دەيىن ءوستى. ياعني، نەسيەلىك وتىنىمدەردىڭ ۇشتەن بىرىنەن ءسال استامى ماقۇلدانىپ، قالعان %60 ىنان باس تارتىلدى.
كەپىلسىز قارىز الۋعا بەرىلگەن ءوتىنىمنىڭ 30 پايىزى عانا ماقۇلداندى
كەپىلسىز نەسيەگە سۇرانىس بەلسەندى تۇردە ءوسىپ جاتىر. مىسالى، ءبىرىنشى توقساندا بۇل كورسەتكىش 2022-جىلدىڭ ءتورتىنشى توقسانىمەن سالىستىرعاندا %8 عا ارتقان. ءبىرىنشى توقساندا قازاقستاندىقتار كەپىلسىز قارىز الۋعا 15,9 ميلليون ءوتىنىم بەرگەن. ال بانكتەر ونىڭ تەك 30 پايىزىن ماقۇلدادى.
كەلىپ تۇسكەن وتىنىمدەر بويىنشا، نەسيەنىڭ ورتاشا سوماسى %56 عا ءوسىپ، 921 مىڭ تەڭگەگە جەتكەن.
جەكە ءىرى بانكتەگى سۇرانىستىڭ تومەندەۋىنە بايلانىستى تۇتىنۋشىلىق نەسيەلەرگە سۇرانىس ەداۋىر ازايدى. قارىز الۋعا بايلانىستى كەلىپ تۇسكەن وتىنىمدەر سانى %37 عا، ياعني 11 مىڭ وتىنىمگە دەيىن قىسقارعان. ال نەسيەلىك ۇيىمدار كليەنتتەرگە قويىلاتىن تالاپتى كۇشەيتە باستادى. ءسويتىپ، وتىنىشتەردىڭ %30 عانا ماقۇلدانعان.
اۆتونەسيە شارتتارى جەڭىلدەدى
بانكتەر 1 توقساندا اۆتونەسيەگە سۇرانىس ارتقانىن انىقتادى. كەلىپ تۇسكەن وتىنىمدەر سانى %7 عا، ياعني 532 مىڭ وتىنىمگە دەيىن كوبەيگەن. ساۋالناماعا قاتىسقان بانكتەر مۇنى اۆتوموبيلدەردى الۋ مەرزىمىنىڭ قىسقارۋىمەن، نارىقتاعى تاپشىلىقتىڭ تومەندەۋىمەن جانە جەڭىلدەتىلگەن اۆتونەسيەلەۋ باعدارلاماسىمەن بايلانىستىرىپ وتىر.
ۇلتتىق بانك اۆتونەسيە شارتتارىنىڭ جەڭىلدەگەنىن اتاپ ءوتتى. الايدا جەكەلەگەن ءىرى بانك كرەديتتىك ليميتتى قىسقارتىپ، كليەنتتەردىڭ تولەم قابىلەتىنە قويىلاتىن تالاپتى كۇشەيتكەن. وسىعان بايلانىستى وتىنىشتەردىڭ شامامەن 13 پايىزى ماقۇلدانعان. سونىمەن قاتار كەلىپ تۇسكەن وتىنىمدەر بويىنشا، نەسيەنىڭ ورتاشا چەگى 606 مىڭ تەڭگەدەن 5,2 ميلليون تەڭگەگە دەيىن ءوستى.
بانكتەر سىياقى مولشەرلەمەسىن قايتا قاراۋى مۇمكىن
ساۋالناماعا قاتىسقان بانكيرلەر تۇتىنۋشىلىق نەسيەلەۋ كورسەتكىشى ءبىرىنشى توقسانداعىداي بولاتىنىن ايتادى. بانكتەر ءوز ونىمدەرىن ۇسىنۋىنا بايلانىستى يپوتەكا مەن اۆتونەسيەگە سۇرانىس ارتادى.
جالپى، بولشەك نەسيەلەۋدە بانكتەر نەسيەلەۋ شارتتارىنا ايتارلىقتاي وزگەرىس ەنگىزۋدى جوسپارلاپ وتىرعان جوق. سونىمەن قاتار بانكتەر ق ر ۇ ب بازالىق مولشەرلەمەسى بويىنشا سىياقى مولشەرلەمەسىن قايتا قاراۋى مۇمكىن.
