الەۋمەتتىك جەلىدەگى بەلسەندىلىك. نەدەن ساق بولۋ كەرەك؟
مۇنداي جەلىلەردىڭ ارتىقشىلىقتارى بار، ال ولاردىڭ قاۋپى جايلى ويلانىپ كوردىڭىز بە؟
ءوزىن-ءوزى باعالاۋعا اسەرى
دوستارىڭىزدىڭ نەمەسە ارىپتەستەرىڭىزدىڭ كەزەكتى سۋرەتىن قاراپ وتىرىپ، ومىردە سىزگە قاراعاندا ولاردىڭ جولى بولدى دەگەن وي مازالايدى ما؟ الدە ءومىر ءسۇرۋ ستيلىڭىزبەن ماقتانۋ ءۇشىن قىمبات سۋسىندارمەن ادەمى جەرلەردە وتىرعان سۋرەتىڭىزدى جاريالاعىڭىز كەلە مە؟ بۇلار تومەن ءوزىن-ءوزى باعالاۋدىڭ بەلگىسى بولۋى مۇمكىن. كوپشىلىك ادام الەۋمەتتىك جەلىلەردەگى باسقالاردىڭ ءومىرىن باقىلاۋ كەزىندە وزدەرىن ادەمى سەزىنبەيدى جانە ومىردە ماڭىزدى ەش نارسەگە جەتپەگەندەي كۇيدە بولادى.
الەۋمەتتىك جەلىدەگى ءبىز كۇندە قارايتىن ءمىنسىز ءومىردى كورسەتەتىن ادەمى سۋرەتتەر ءوزىمىزدى باسقالارمەن سالىستىرۋعا يتەرمەلەيدى. سوندىقتان دا الەۋمەتتىك جەلىگە جۇمسايتىن ۋاقىتىڭىزدى شەكتەڭىز. سونداي-اق الەۋمەتتىك جەلىدە ادامدار ءوز ءومىرىن اسىرا ادەمىلەتىپ كورسەتۋگە بەيىم ەكەنىن ءتۇسىنىڭىز. ادەمى جۇپتىڭ ءمىنسىز سۋرەتىنىڭ ارتىندا ءوزارا پروبلەمالار مەن كەلىسپەۋشىلىكتەر تۇرۋى مۇمكىن. سوندىقتان ءوزىڭىزدى ەشكىممەن سالىستىرماڭىز.
جاعىمسىز جاڭالىقتار اعىنى
الەۋمەتتىك جەلىلەردە الدىمىزدان جاعىمسىز اقپاراتتار تولىپ شىعادى: كاتاكليزمدەر، ولىمگە اكەلەتىن اۋرۋمەن كۇرەس، بىرەۋدىڭ ءولىمى جانە ت. ب. مۇنداي جاڭالىقتاردى كورگەن سايىن ءسىزدىڭ كوڭىل كۇيىڭىز تۇسە بەرەدى. بۇل بارا-بارا كۇيزەلىسكە اكەلۋى مۇمكىن. بۇل دا الەۋمەتتىك جەلىدە از ۋاقىت وتكىزۋگە سەبەپ.
اۋىر جۇمىس كۇنىنەن كەيىن دەمالعىڭىز كەلسە، ۇيالى تەلەفوندا الەۋمەتتىك جەلىنى اقتارۋدىڭ ورنىنا ۆانناعا جاتىڭىز نەمەسە قىزىقتى فيلم قاراڭىز. سونداي-اق ءوز-وزىڭىزبەن جۇمىس جاساڭىز. ءار جاعىمسىز جاڭالىقتى جۇرەگىڭىزگە جاقىن قابىلداماۋدى ۇيرەنىڭىز. ارينە، بۇل مۇلدەم جاڭالىق وقىماڭىز دەگەن ءسوز ەمەس، ءبىراق ولاردىڭ ومىرىڭىزگە اسەرىن ازايتۋعا بولادى.
FOMO سيندرومى
FOMO سيندرومى جايلى ەستىدىڭىز بە؟ بۇل قىزىقتى وقيعانى نەمەسە قانداي دا ءبىر مۇمكىندىكتى جىبەرىپ الۋدان قورقۋ. ەگەر بىردەن الەۋمەتتىك جەلىگە كىرىپ تەكسەرمەسەڭىز، قىزىقتى بىردەڭەنى جىبەرىپ الاتىنداي سەزىمدە بولاسىز. سول ءۇشىن ۇنەمى الەۋمەتتىك جەلىدەگى جاڭالىقتاردى جاڭارتىپ تەكسەرىپ وتىراسىز. بۇل سيندروم الەۋمەتتىك جەلىدە كوپ ۋاقىت وتىراتىن ادامداردا پايدا بولادى.
سوندىقتان الەۋمەتتىك جەلىگە ارنايتىن ۋاقىتتى شەكتەڭىز جانە ناعىز ءومىر ەكراننان تىس جەردە ەكەنىن ءتۇسىنىڭىز.
ۇيقىسىزدىق
بارلىق ادام دەرلىك ۇيىقتار الدىندا الەۋمەتتىك جەلىگە كىرىپ، جاڭالىقتاردى ءبىر قاراپ شىعادى. ودان ۇزاققا دەيىن شىعا المايتىندار دا بار. ۇيالى تەلەفوندى تاستاسا، ۇيقىسى كەلمەيدى دە، ونى قايتادان قولىنا الادى. سەبەبى گادجەت ەكرانىنىڭ جارىعى ۇيقى گورمونى - مەلاتونين ءبولىنۋىن تومەندەتەدى. سوندىقتان ءسىزدىڭ بۇل ادەتىڭىز ۇيقىسىزدىققا اكەلۋى مۇمكىن. وعان قوسا، مي وزىنە تۇسكەن بارلىق اقپاراتتى «قورىتىپ» ۇلگەرمەيدى.
ۇيىقتارعا ءبىر ساعات قالعاننان باستاپ گادجەتتەردى ۇستاماڭىز. ونىڭ ورنىنا كىتاپ وقىڭىز، بالالارمەن اڭگىمە ايتىڭىز جانە ارمانداڭىز.
الاياقتىق تۇرلەرى
بۇرىننان ادام كوپ جينالاتىن جەر - الاياقتار ءۇشىن قولايلى ورتا. سول سەكىلدى الاياقتار جالپى ينتەرنەتتى، سونىڭ ىشىندە الەۋمەتتىك جەلىلەردى پايدالانادى. ەگەر ينتەرنەت جەلىسىن ءجيى قولداناتىن بولساڭىز، كەي سايتتار قانداي دا ءبىر قىزمەتتى الۋ ءۇشىن س م س- حات جولداۋىڭىزدى سۇرايدى. مىسالى، فيلم، كىتاپ، ويىن جانە ت. ب جازىپ الۋ ءۇشىن الدىمەن س م س- حات جولداۋ كەرەك. وعان قوسا، مىناداي جارناما شىعا بەرەدى: «ادام ءنومىرىن بىزگە حاتپەن جولداپ، جابىق بازاداعى ول جايلى اقپاراتتى ءبىلىڭىز» نەمەسە «ادامنىڭ ءنومىرىن حات ارقىلى جولداساڭىز، ونىڭ حاتتارىن وقي الاسىز» جانە ت. ب. سونداي-اق قانداي دا ءبىر تەست ءوتتىڭىز، ءبىراق ونىڭ جاۋابىن الۋ ءۇشىن س م س- حات جولداۋىڭىز كەرەك. مۇنىڭ بارلىعى - الاياقتىقتىڭ ءبىر ءتۇرى. بۇل الاياقتىق ءتۇرىنىڭ الەۋمەتتىك جەلىمەن قانداي بايلانىسى بار؟ مۇنداي سايتتارعا بارلىق جارناما الەۋمەتتىك جەلىلەر ارقىلى تارايدى. ادەتتە، س م س- حاتتىڭ باعاسى جوعارى بولىپ شىعادى.
سونىمەن قاتار، الاياق ءسىزدىڭ پاراقشاڭىزدى ۇرلاپ الا الادى. سودان سوڭ ول ءسىز جايلى جانە دوستارىڭىز جايلى اقپارات الادى. سودان سوڭ ولار جاقىن دوسىڭىزعا نەمەسە تانىسىڭىزعا قانداي دا ءبىر سىلتەمەگە ءوتۋىن، بىردەڭەنى كوشىرىپ جازىپ الۋدى نەمەسە قارىزعا اقشا بەرە تۇرۋىن سۇرايدى. ەكراننىڭ ارعى جاعىندا وتىرعان ادام بۇل حاتتى جىبەرگەن ءسىز بە الدە الاياق پا بىلمەيدى دە، ءوتىنىشتى ورىندايدى. الاياقتىقتىڭ ءتۇر-ءتۇرى بار. بۇل تەك كەڭ تاراعان تۇرلەرى.
سونداي-اق الەۋمەتتىك جەلىلەردە ۇرلىقشىلار، پسيحيكالىق اۋرۋى بار ادامدار دا وتىرادى. سول ءۇشىن الەۋمەتتىك جەلىدە بەلسەندى بولامىن دەپ جەكە اقپاراتتى جاريالاپ قويۋعا بولمايدى. ادامنىڭ الەۋمەتتىك جەلىسى ارقىلى كوپ مالىمەت الۋعا بولادى. ەگەر اتاقتى جۇلدىز نەمەسە بلوگەر بولماساڭىز جانە الەۋمەتتىك جەلى ارقىلى اقشا تابۋ جوسپارىڭىزدا بولماسا، پاراقشاڭىزدى جابىق ەتىپ قويعان دۇرىس.
massaget.kz
