الماتىنىڭ باس جوسپارى: ساراپشى كۆارتالدىق قۇرىلىستىڭ ارتىقشىلىقتارىن اتادى
ونىڭ ارقاسىندا تۇرعىن عيماراتتار الەۋمەتتىك- تۇرمىستىق ينفراقۇرىلىم وبەكتىلەرى مەن دەمالىس ايماقتارىنىڭ جانىندا ورنالاساتىن بولادى.
بۇل تۋرالى قازاقستاننىڭ قۇرمەتتى ساۋلەتشىسى سايران فازىلوۆ ايتتى، دەپ حابارلايدى قازقپارات ءتىلشىسى.
سايران فازىلوۆتىڭ سوزىنشە، الماتىنىڭ جاڭا باس دامۋ جوسپارىنىڭ نەگىزگى اسپەكتىلەرىنىڭ ءبىرى - جاڭا تۇرعىن ءۇي قۇرىلىسى كەزىندە قالانىڭ ورتالىق بولىگىنىڭ تاريحي قالىپتاسقان كۆارتالدىق قۇرىلىسىنىڭ ساباقتاستىعىمەن بايلانىستى بولۋى.
«مەنىڭ ويىمشا، بۇل ءتاسىل مادەني جانە ارحيتەكتۋرالىق مۇرانى ساقتاۋ تۇرعىسىنان ماڭىزدى ءارى ۇيلەسىمدى جانە جايلى قالالىق ورتانى قۇرۋعا ىقپال ەتەدى»، - دەيدى ساۋلەتشى.
ونىڭ ايتۋىنشا، قازىر الماتىنىڭ تاريحي ورتالىعى عانا جايلى قالانىڭ زاماناۋي مودەلىنىڭ نەگىزگى تالاپتارىنا ساي كەلەدى. ول مەكتەپتەر مەن بالاباقشالارعا، قوعامدىق كەڭىستىكتەرگە جاياۋ جەتۋگە جاقسى مۇمكىندىك جاسايدى.
«باس جوسپار اياسىندا كولەمى 160 *250 مەتر كۆارتالداردىڭ پارامەترلەرى پايدالانىلاتىن بولادى. بۇل دامۋدىڭ وڭتايلى قۇرىلىمىن، سونداي- اق بۇرىننان بار كۆارتالدارمەن ۇيلەسىمدىلىكتى قامتاماسىز ەتەدى، وسىلايشا قالالىق كەڭىستىكتىڭ بىرلىگى مەن تۇتاستىعىن ساقتايدى»، - دەدى سپيكەر.
سونىمەن قاتار، ول سوڭعى ونجىلدىقتا قالا نەگىزىنەن تاۋ بوكتەرىنە جاقىن ورتالىق جانە جوعارعى (وڭتۇستىك) بولىكتەرىندە دامىعانىن اتاپ ءوتتى. بىلتىر جاز ايىندا جۇرگىزگەن قالالىق ساۋالنامانىڭ الدىن الا ناتيجەلەرى كورسەتكەندەي، قالا تۇرعىندارىنا الەۋمەتتىك نىساندار، قوعامدىق كەڭىستىكتەر، بالالاردى دامىتۋ ورتالىقتارى، ۇيىرمەلەر، سەكتسيالار، سپورت الاڭدارى جەتىسپەيدى. كوممەرتسيالىق نىسانداردىڭ ىشىندە فيتنەس ورتالىقتارى، شىعارماشىلىق شەبەرحانالار، وتباسىلىق كافەلەر مەن كوۆوركينگتەر جەتكىلىكسىز.
«كۆارتالدىق قۇرىلىس، بىرىنشىدەن، قالانىڭ كەز كەلگەن اۋدانىنداعى تۇرعىندار ءۇشىن قولايلى الەۋمەتتىك ورتانى قۇرايدى. ەكىنشىدەن، بۇل كولىك كەپتەلىسى مەن تۇراق ماسەلەلەرىن شەشۋگە مۇمكىندىك بەرەدى. ۇشىنشىدەن، جاسىل ايماقتاردىڭ ۇلعايۋىنا ىقپال ەتەدى. كۆارتالدىق قۇرىلىستىڭ ارقاسىندا تۇرعىن عيماراتتار الەۋمەتتىك- تۇرمىستىق ينفراقۇرىلىم وبەكتىلەرى مەن دەمالىس ايماقتارىنىڭ جانىندا ورنالاساتىن بولادى. مۇنداي دامۋ قۇرىلىس ءۇشىن قولجەتىمدى اۋماقتاردى الدەقايدا ءتيىمدى پايدالانۋعا مۇمكىندىك بەرەدى، بۇل تۇرعىن ءۇيدى ادامدار ءۇشىن قولجەتىمدى ەتەدى»، - دەيدى ساراپشى.
ايتا كەتەيىك، ق ر ۇكىمەتى الماتى قالاسىنىڭ 2040 -جىلعا دەيىنگى باس جوسپارىن بەكىتتى.
